Ըստ թուրք նախարարի՝ Թուրքիան բացի ռուսական S-400-ներից, կարող է ունենալ նաև ամերիկյան Patriot-ներ

Թուրքիայի պաշտպանության նախարար Հուլուսի Աքարը հայտարարել է, որ Ռուսաստանից ձեռք բերած S-400 ՀՕՊ համակարգերը գործարկվելու են, անկախ  այն բանից Անկարան ընդգրկված է ՆԱՏՕ-ի պաշտպանական համակարգի մեջ, թե ոչ:

«S-400-ները չեն ինտեգրվելու ՆԱՏՕ-ի ընդհանուր հրամանատարական կառավարման ենթակառուցվածքների մեջ։ Անկախ ամեն ինչից՝ դրանք գործարկվելու են»,- ասել է թուրք նախարարը պետական ТRТ հեռուստաընկերության տված հարցազրույցի ժամանակ։

Նա պնդել է, որ ռուսական ՀՕՊ համակարգերի ձեռքբերումն ամենևին չի նշանակում, որ Թուրքիան առանձնանում է ՆԱՏՕ-ից։ Ըստ Աքարի՝ Անկարան դեռևս պատրաստ է դիտարկել ամերիկյան Patriot ՀՕՊ համակարգերը գնելու տարբերակը, եթե Վաշինգտոնն Անկարային առաջարկի հարմար տարբերակ։

Հիշեցնենք, որ S-400-ների պայմանագիրը Թուրքիայի և Ռուսաստանի միջև ստորագրվել է 2017թ.։ Առաջին խմբաքանակը Թուրքիա մատակարարվեց 2019թ. հուլիսին։ Ռուս-թուրքական գործարքը լուրջ ճգնաժամ էր առաջացրել թուրք-ամերիկյան հարաբերություններում։