Մեկնարկել է 2017թ. «Արի տուն» ծրագիրը

Ապրիլի 10-ին ՀՀ սփյուռքի նախարարությունում տեղի ունեցավ 2017թ. Սփյուռքի երիտասարդների հայրենաճանաչության «Արի տուն» ծրագրի բացման հանդիսավոր արարողությունը:

Այս փուլով Հայաստան է այցելել 66 պատանի ու աղջիկ Ֆրանսիայի Ալֆորվիլ քաղաքի «Ս. Մեսրոպ-Արապեան», Փարիզի «Դպրոցասեր» եւ Մարսելի «Համազգային» վարժարաններից՝ 10 ուսուցչի ուղեկցությամբ:

Մասնակիցներին ողջունեց ՀՀ սփյուռքի նախարար Հրանուշ Հակոբյանը: Նա մասնավորապես նշեց. «Բարով եք եկել Հայրենիք, սիրելի՛ պատանիներ եւ աղջիկներ: Ձեզանից շատերի համար սա առաջին այցն է Հայաստան եւ վստահ եմ, որ այն անմոռանալի կդառնա ձեզ համար, եւ դուք կվերադառնաք Ֆրանսիա՝ կրկին Հայաստան գալու ցանկությամբ, երազանքով: Շնորհակալ եմ «Ս. Մեսրոպ- Արապեան», «Դպրոցասեր» եւ «Համազգային» վարժարանների ուսուցիչներին եւ աշակերտներին ուղեկցող ողջ անձնակազմին: Վստահ եմ, որ մեր երեխաները շատ բան են լսել եւ շատ բան գիտեն իրենց երկրի պատմության, գրականության, մշակույթի մասին, եւ այդ ամենի համար նրանք պարտական են իրենց ուսուցիչներին եւ ծնողներին»:

Նախարար Հրանուշ Հակոբյանը հատուկ շնորհակալություն հայտնեց ֆրանսահայ բարերար Սարգիս Բեդոյանին՝ 11 տարի շարունակ Ֆրանսիայի հայկական վարժարանների աշակերտների այցը Հայաստան հովանավորելու համար: «Հայաստան բերելով օտար ափերում մեծացած երեխաներին՝ Դուք նրանց հնարավորություն եք ընձեռում տեսնել իրական Հայրենիքը, մեր վանքերն ու Մատենադարանը, Զվարթնոցն ու Սեւանը, այլ պատմամշակութային վայրերը, որից հետո նրանք որտեղ էլ ապրեն եւ ինչ էլ անեն, միշտ հայ կմնան եւ միշտ կձգտեն վերադառնալ Հայաստան»:

Այնուհետեւ նախարարը «Արի տուն» ծրագրի տարբերանշանով շապիկ եւ գլխարկ հագցրեց ամենակրտսեր մասնակից Ալֆորվիլի «Ս. Մեսրոպ-Արապեան» վարժարանի սան Հարություն Վրթանեսյանին:

«Ս. Մեսրոպ-Արապեան» կրթարանի անունից շնորհակալական խոսքով հանդես եկավ հայոց լեզվի եւ գրականության ուսուցչուհի Սիրարփի Կոսոյանը: Նա նշեց, որ երեխաներն անհամբերությամբ եւ մեծ սիրով են սպասում Հայաստանի տեսարժան վայրեր այցելություններին:

Փարիզի «Դպրոցասեր» վարժարանի ուսուցչուհի Նոռա Պարութճեան-Պասիքեանը կարեւորեց արեւմտահայերենը Հայաստանում գործածական լեզու դարձնելու անհրաժեշտությունը: «Այդ դեպքում հայերենի արեւելահայ եւ արեւմտահայ ճյուղերով խոսողներն իրար արագ հասկանալու արգելք այլեւս չեն ունենա», -նշեց նա:

Բարերար Սարգիս Բեդոյանն իր խոսքում նշեց. «Շնորհակալություն, սիրելի՛ տիկին Հակոբյան, Ձեր ջերմ ընդունելության համար: Դուք ամեն տարի սիրով եք ընդունում մեր երեխաներին: Այո՛, անհրաժեշտ է, որ մեր պատանիներն ու աղջիկները տեսնեն իրենց հողը, որոնվետեւ նրանք են մեր ապագան, մեր վաղվա զինվորները»:

Միջոցառման ընթացքում արիտունցիները երգեցին եւ արտասանեցին հայ հեղինակների, գրողների ստեղծագործություններ: Կոմիտասյան կատարումներով հանդես եկավ Արարատյան թեմի «Ծաղկազարդ» համույթը:

Մասնակիցները հնարավորություն ունեցան դիտելու «Արի տուն» ծրագրի մասին պատմող ֆիլմ: