Ընդդիմադիր ուժերի միավորումն այլընտրանք չունի

Արդեն իսկ ձևավորվում են նախընտրական դաշինքները և քիչ թե շատ հստակ էդառնում, ինչ տեսք կունենա նախընտրական պայքարն ու բուն ընտրական գործընթացը։ Երեկ «Համախմբում», «Երրորդ Հանրապետություն» և Հայաստանի դեմոկրատական կուսակցությունները հայտարարեցին դաշինքով ընտրություններին մասնակցելու մասին։ Ընդդիմադիր ուժերի միավորումը շատ դրական է և ստեղծված պայմաններում այլընտրանք չունի։

Լավ է, որ այս ուժերը դա հասկացել են, և մի կողմ դնելով նեղ կուսակցական և անձնական ամբիցիաները միավորվել են երկրում դրական փոփոխություններ իրականացնելու գաղափարի շուրջ։ Այժմ այդ ուժերը պետք է հստակեցնեն իրենց պատկերացումները և հանրությանը ներկայացնեն երկրում առկա խնդիրների լուծման իրենց տեսլականը։ Այս իշխանությունից ազատվելն, իհարկե, անհրաժեշտ է, բայց մարդիկ պետք է իմանան, ինչին են ձայն տալիս՝ անձերի փոփոխությանը, թե ավելի արմատական համակարգային փոփոխությունների, ժողովրդավարության հաստատմանն ու սեփական բարեկեցության պայմանների ստեղծմանը։

Համոզված եմ, այս երեք ուժերը կարող են երկրորդ տարբերակն առաջարկել հասարակությանը, ներկայացնել զարգացման ծրագիր։ Համոզված եմ նաև, որ այլ ուժեր ևս կմիանան դաշինքին, հանուն ազատության և արդարության։ Ժողովուրդը պետք է դառնա իշխանություն ձևավորողը և այս ընտրությունները տալիս են դրա հնարավորությունը։ Պետք է ուղղակի բավականաչափ կամք դրսևորել և մեկ ընդ միշտ ազատագրել Հայաստանը։ Հետո արդեն այսօրվա ընդդիմադիր ուժերը կարող են իրենց թույլ տալ մրցել միմյանց հետ։

Հրանտ Ենոքյանի ֆեյսբուքյան էջից