Ղարաբաղյան հակամարտության կարգավորման «կարմիր գծերը» և հիմնարար սկզբունքները ըստ Ալիևի և Փաշինյանի. Տեսանյութ

Հայաստանի և Ադրբեջանի ղեկավարներ Նիկոլ Փաշինյանը և Իլհամ Ալիևը միաժամանակ պատասխանել են «РИА Новости»-ի հարցերին Լեռնային Ղարաբաղի հարցով: Հարցազրույցը վարել է «Россия сегодня» մեդիախմբի գլխավոր տնօրեն Դմիտրի Կիսիլյովը:

Նիկոլ Փաշինյանը և Իլհամ Ալիևը ներկայացրել են իրենց գնահատականները հակամարտության գոտում տիրող իրավիճակի վերաբերյալ, ինչպես նաև պատասխանել են այն հարցին՝ թե որն է այն կարմիր գիծը, որից այն կողմ չեն անցնի կողմերը հակամարտության կարգավորման հարցում: Ինչպես նաև այն փոխզիջումները, որոնց պատրաստ են գնալ կողմերը ԼՂ հակամարտության կարգավորման հարցում:

Երևանի համար կարմիր գիծը Լեռնային Ղարաբաղի բնակչության ինքնորոշման իրավունքն է, հայտարարել է Հայաստանի վարչապետ Նիկոլ Փաշինյանը:

«Միշտ, բոլոր ժամանակներում Հայաստանը պատրաս է եղել փոխզիջումների։ Եվ ամենահայտնին Կազանյան նախաձեռնությունն է, երբ Հայաստանը պատրաստ էր կոնկրետ փոխզիջման։ Բայց Ադրբեջանը հրաժարվեց ստորագրել համաձայնագիրը, քանի որ Ադրբեջանը չէր ուզում ու չի ուզում ընդունել Լեռնային Ղարաբաղի հայության ինքնորոշման իրավունքը»,– ասաց Փաշինյանը։

Պատասխանելով հարցին, թե կոնկրետ ինչ փոխզիջումների է պատրաստ Հայաստանը, Փաշինյանն ասել է, որ մոսկովյան համաձայնագրում հստակ քննարկվել ու արձանագրվել են այն քայլերը, որոնք անհրաժեշտ են բանակցային գործընթացի վերականգնման համար։ ՀՀ վարչապետը հայտարարել է, որ Հայաստանը պատրաստ է իրականացնել ադ քայլերը` ԼՂ խնդրի լուծման համար։

«Մենք պատրաստ են այնպիսի համարժեք փոխզիջումների, որոնց պատրաստ է Ադրբեջանը»,– ընդգծել է Փաշինյանը։