Միայն կրակի ամբողջական դադարից հետո կարող ենք բոլոր հարցերում արդյունավետ առաջ գնալ. Զոհրաբ Մնացականյան. Տեսանյութ

Մոսկվայում տեղի ունեցավ ՀՀ և ՌԴ ԱԳ նախարարների հանդիպումը, որից հետո նախարարները հանդես եկան համատեղ մամուլի ասուլիսով։ Զոհրաբ Մնացականյանը ներկայացրեց Արցախում տիրող իրավիաճկը։ Նախարարը շեշտեց, որ Միայն կրակի ամբողջական դադարից հետո կարող ենք արդյունավետ առաջ գնալ բոլոր հարցերում։

Մնացականյանն իր խոսքում նշել է, որ այն, ինչի հետ իր հայրենակիցները բախվել են Լեռնային Ղարաբաղում, մի քանի տասնամյակների ընթացքում հասունացած գոյաբանական սպառնալիքի մարմնավորում է:

ԱԳ նախարարն ընդգծել է, որ ՌԴ նախագահ Վլադիմիր Պուտինի նախաձեռնությամբ վերջերս կայացած եռակողմ հանդիպմանը ձեռք էր բերվել որոշակի արդյունք։ Նախարարը շեշտել է, որ հայկական կողմը բարձր է գնահատում այս հարցում ռուսական կողմի ավանդը։

«Անհրաժեշտ է առաջին հերթին դադարեցնել մարտական գործողությունները։ Ադրբեջանն իր պարտավորությունները չի կատարում»,- ասել է Մնացականյանը:

Նա ընդգծել է, որ անհրաժեշտ է համապատասխան մեխանիզմների ներդրում:

Միևնույն ժամանակ պաշտոնյան նշել է, որ Երևանն ու Բաքուն ՌԴ-ի և Կարմիր խաչի միջազգային կազմակերպության միջնորդությամբ քննարկում են ԼՂ-ում հրադադարի մեխանիզմների ստեղծումը:

«Այժմ այս հարցերով  ընթանում են որոշակի բավական հստակ խորհրդակցություններ:Մեր համատեղ հայտարարությունում ասված է, որ առաջնահերթություն է համարվում կրակի դադարեցման ու հատուկ մեխանիզմների ապահովումը»,- ասել է Մնացականյանը:

Մանրամասները՝ տեսանյութում։