Իրականում շնորհակալ են Ծառուկյանից
Գագիկ Ծառուկյանի վերադարձը քաղաքականություն ոչ միայն որոշակի ակտիվություն մտցրեց դաշտում, այլև որոշակի պարապ շրջանակների համար դարձավ խոսակցության հիմնական թեմա:
Խոսքը սոցիալական ցանցերում «հաստիքային» աշխատողների մասին է: Մասնավորապես, Ծառուկյանի երեկվա հայտարարությունից հետո սույն զանգվածը լծվել է ԲՀԿ ղեկավարին «փչացնելու» գործին:
Կես դրույքով «ստատուսչի» աշխատող այս իրական և «ֆեյք» անձինք Ծառուկյանի դեմ օրը 26 գրառում կատարելուց զատ, անցնում են խմբերով, կայքերով ու իրենց «հեղինակավոր» կարծիքն արտահայտում: Եթե իրենք քաղաքական պատվերի շրջանակներում այդ կերպ գումար են վաստակում, դա չի նշանակում, թե իրենց ստեղծած «իրականությունը» մարդկանց վրա ազդեցություն ունի:
Խնդիրն այն է, որ այդ «ստատուսչիներն» աշխատում են որոշակի նեղ շրջանակում, որտեղ հիմնականում քաղաքականապես հասուն մարդիկ են և քիչ են տրվում նման քարոզչության: Իսկ, վիրտուալից դուրս բոլորովին այլ իրականություն է ու այլ իրավիճակ: Այս մասին շատ լավ գիտեն նաև իշխանությունները. տեղական» «Գելլափ»-ի միջոցով նրանք արդեն հասցրել են հասկանալ իրական պատկերը:
Հենց իրական պատկերի նկատմամբ վախի դոզան է ստիպում իշխանություններին, գործի դնել «ֆեյքերի» այս վիրտուալ բանակը, որոնք կոչված են «հանրային կարծիք» ձևավորելու կամ նման իմիտացիա ստեղծելու:
Նկատենք նաև, որ կես կամ լրիվ դրույքով «ֆեյք» աշխատող այդ անձինք, մինչև Ծառուկյանի վերադարձը, օրը մի քանի տասնյակ գրառում էին կատարում արևի և «հայու գենի» մասին. հիմա նրանք գրելու, խոսելու նոր թեմա ունեն, որն էլ նրանց կկերակրի մինչև խորհրդարանական ընտրություններ: Այս առումով, նրանք, ըստ երևույթին, ներքուստ շնորհակալ են Ծառուկյանին և մնացած քաղաքական ուժերին:
Հասմիկ Գրիգորյան
Հետևեք մեզ Facebook-ում