Էրդողանը Ղարաբաղում ստուգում է Պուտինի համբերությունը

Ըստ ամերիկյան Bloomberg-ի նոր սկսված ղարաբաղյան պատերազմը կարող է վերջնականապես փչացնել ՌԴ նախագահ Վլադիմիր Պուտինի ու Թուրքիայի նախագահ Ռեջեփ Թայիփ Էրդողանի հարաբերությունները: Մոսկվայում համոզված են, որ այս նոր պատերազմը սկսվել է հենց Էրդողանի հորդորով և վերջինիս նպատակն է տարածել Թուրքիայի ազդեցությունը նաև Անդրկովկաս:

Ըստ Կրեմլին մոտ կանգնած փորձագետ Ալեքսանդր Դինկինի, Մոսկվային հաջողվեց նորմալ հարաբերություններ հաստատել Անկարայի հետ, չնայած նրան, որ երկու այս տերությունները լուրջ հակասություններ ունեին թե՛ Սիրիայում, և թե՛ Լիբիայում: Այդ երկրներում՝ Մոսկվան և Անկարան կարողացան հաստատել  իրենց շահերի գծերը և նույնիսկ ընդնանուր հայտարարի գալ: Մինչդեռ Լեռնային Ղարաբաղում Թուրքիան փորձում է լարվածության նոր գոտի ձևավորել, որպեսզի այստեղ էլ ընդհանուր հայտարարի հանգի Մոսկվայի հետ: Սակայն ի տարբերություն Սիրիայի և Լիբիայի, այս տարածաշրջանը Մոսկվան ամբողջովին իր ազդեցության գոտին է համարում: Եվ այդ տեսանկյունից Անկարայի այս քայլը դիտարկում է որպես աշխարաքաղաքական դեմարշ: Դինկինի կարծիքով, եթե այս կոնֆլիկտում Անկարան ուղղակի իր զորքով միջամտի, ապա դա կդառնա Պուտինի համար այն կարմիր գիծը, որից հետո Մոսկվան կդիմի կոշտ միջոցների: Բացի այդ, եթե գրոհայինների հարցը Անդրկովկասում Անկարան նույնպես չլուծի, ապա դա էլ կարող է պատրվակ դառնալ Մոսկվայի անմիջական գործողության համար:

Ըստ  Bloomberg-ի, Էրդողանը պետք է զգուշանա Պուտինից, քանզի Ղարաբաղը համեմատելի չէ ո՛չ Սիրիայի, ո՛չ էլ Լիբիայի հետ, քանզի ի տարբերություն վերջիններիս, Ղարաբաղը երբեք իր պատմության մեջ չի եղել Օսմանյան կայսրության ո՛չ կազմում, ո՛չ էլ նույնիսկ իր ազդեցության գոտիում:

Zham.am