«Սա ռազմական հանցագործություն է։ Սա ահաբեկչություն է»․ հոլիվուդյան ոճաբան Ավո Երմագյանը՝ Սուրբ Ամենափրկիչ Ղազանչեցոցի հրթիռակոծության մասին

Հոլիվուդյան հայազգի ոճաբան Ավո Երմագյանն անդրադարձել է Ադրբեջանի կողմից Շուշիի Սուրբ Ամենափրկիչ Ղազանչեցոց Մայր տաճարի հրթիռակոծմանը։ Միկրոբլոգի իր էջում հայտնի ոճաբանը հրապարակել է ոճրագործությունից հետո արված լուսանկարներ, որոնց կից գրել է․

«Ադրբեջանական զինված ուժերը՝ Թուրքիայի աջակցությամբ, թիրախավորել եւ հարված են հասցրել Արցախի Սուրբ Ամենափրկիչ Ղազանչեցոց Մայր տաճարին, որը Շուշի քաղաքի խորհրդանիշն է։ Հարվածների պահին տաճարի նկուղում պատսպարվել են միայն կանայք եւ երեխաներ։

Տաճարի շուրջ 2 կմ շառավղով ռազմական ոչ մի օբյեկտ եւ ռազմական օբյեկտի նման ոչինչ չկա։

Եվ հենց այն պահին, երբ լրագրողները նկարահանում էին առաջին հարվածի հետեւանքները, հասցվել է երկրորդ նպատակային հարվածը՝ երեք լրագրող այժմ վիրավորված են։

Սա ռազմական հանցագործություն է։

Սա միջազգային մարդասիրական իրավունքի խախտում է։

Սա ահաբեկչություն է։

Խնդրում եմ, օգնեք դատապարտել Թուրքիայի եւ Ադրբեջանի սարսափելի գործողությունները»։

Աղբյուր՝ Style.News.am