Հենրիխ Մխիթարյանը նամակով դիմել է ԵԱՀԿ Մինսկի խմբի համանախագահներին

Աշխարհահռչակ հայ ֆուտբոլիստ, իտալական «Ռոմա»-ի կիսապաշտպան Հենրիխ Մխիթարյանը նամակով դիմել է ԵԱՀԿ Մինսկի խմբի համանախագահներին։ 

«Ես պրոֆեսիոնալ մարզիկ եմ, ով ներկայացնում է Հայաստանը և ով այս նամակը գրում է «ծանր սրտով»:

Հենրիխ Մխիթարյանը կոչով դիմել է ԵԱՀԿ Մինսկի խմբի համանախագահ երկրների առաջնորդներին։

Մեծարգո Վլադիմիր Պուտին

Մեծարգո Էմանուել Մակրոն

Մեծարգո Դոնալդ Թրամփ

ԵԱՀԿ Մինսկի խմբի համանախագահներ.

Քանի որ աշխարհն ականատես է Արցախում տեղի ունեցող այս աննախադեպ և ողբերգական պատերազմին, թույլ տվեք իմ խորն անհանգստությունն արտահայտել և ասել. Հայրենիքս գտնվում է իրական վտանգի առջև:

Արդեն երկու շաբաթ է, ինչ ընդանում են ծանր մարտեր: Իմ հայրենի Արցախը և Հայաստանը պաշտպանվում են ագրեսորի հարձակումներից:

Պաշտպանում ենք մեր գոյության իրավունքը՝ ապրելու մեր պատմական հողում և պաշտպանելու քրիստոնեության ժառանգությունը և արժեքները:

Պատերազմական գործուղությունների ուժգնացումն ինձ մեծ ցավ է պատճառում: Ադրբեջանական զինված ուժերը Ստեփանակերտում թիրախավորում են՝ դպրոցներ, մանկապարտեզներ, հիվանդանոցներ և այլ քաղաքացիական ենթակառուցվածքներ: Հրթիռային զենքերը օգտագործվում են խաղաղ բնակչության դեմ և հանգեցնում են մեծաթիվ զոհերի ու վիրավորների:

Այս ամենի հետևանքով, մենք կտեսնենք բազում խեղված կյանքեր և ճակատագրեր: Սա պատերազմական հանցագործություն է: Ձեր ուշադրությունն եմ հրավիրում, որ ստեղծված իրավիճակը հանգեցրել է հումանիտար աղետի:

Ավելին, այս ողբերգության մեջ իրենց ուղղակի մասնակցությունն ունեն տարածաշրջանում գործող արտաքին ուժերը:

Օտար վարձկանները (ահաբեկիչները), մոտեցել են Ռուսաստանի և Եվրոպական միության սահմաններին, ինչը սպառնալիք է հանդիսանում այդ երկրների անվտանգության համար: Հայաստանը և Արցախը միայնակ պայքարում են միջազգային ահաբեկչության դեմ:

Հանդիսանալով Հայաստանի Հանրապետության պատմական դաշնակիցներ և ԵԱՀԿ Մինսկի խմբի համանախագահներ, դուք կարող եք միջամտել և Ադրբեջանին ստիպել կանգնեցնել այս կործանարար պատերազմը: Երկրի զարգացմանը մասնակցելու փոխարեն, մեր երիտասարդները մահանում են առաջնագծում:

Կոչ եմ անում օգտագործել ձեր բոլոր կարողությունները և դադարեցնել մարդկային այս ողբերգությունը ու կողմերին վերադարձնել խաղաղ բանակցությունների սեղանի շուրջ:

Հարգանքներով, Հենրիխ Մխիթարյան», - գրել է նա։