Իսրայելը զենքով բեռնված ինքնաթիռներ է ուղարկում Ադրբեջան. Al Arabiya

Իսրայելն Ադրբեջանի և Հայաստանի միջև վերջին տարիների ընթացքում ամենալարված բախման ֆոնին զենք է ուղարկում Բաքու: 

Ինչպես հայտնում է Al Arabiya-ն, այս մասին տեղեկացրել են պաշտոնական և հետախուզական աղբյուրները: Փոխանցում է Tert.am-ը։ 

Պարբերականը նկատում է, որ ռազմական գործողությունների թեժացմանը զուգահեռ գնալով ավելի շատ երկրներ են ներքաշվում՝ առաջնորդվելով տարատեսակ քաղաքական և ռազմավարական շահերով:

«Իսրայելն Ադրբեջանի զենքի գլխավոր մատակարարներից մեկն է՝ չնայած Հայաստանն այցած ամիս է պաշտոնապես դեսպանատուն բացել Թել Ավիվում: Իսրայելն ու Ադրբեջանը խոշոր առևտուր են անում նավթի և զենքի ոլորտներում: Անցած հանգստյան օրերի ընթացքում ԱՄՆ հետախուզության աղբյուրն Al Arabiya-ին հայտնել է, որ Իսրայելը զենքով բեռնված ինքնաթիռներ է ուղարկում Ադրբեջան»,-գրում է պարբերականը:

«Իսրայելը զենք է մատակարարում Ադրբեջանին. այսօր Իսրայելից բեռ տեղափոխող երկու ինքնաթիռ արդեն վայրէջք է կատարել Բաքվում»,-ասել է աղբյուրը:

Մինչդեռ Ադրբեջանի նախագահի՝ արտաքին քաղաքականության գծով խորհրդական Հիմքեթ Հաջիևն Axios-ի հետ զրույցում ասել է, որ Բաքվի պաշտպանական համագործակացությունն Իսրայելի հետ գաղտնիք չէ:

Աղբյուր՝ Tert.am