Արմեն Մարտիրոսյան. «Այս խորհրդարանը ոչ լեգիտիմ է» (Տեսանյութ)
Արմեն Մարտիրոսյանը այսօր մամուլի ասուլիսի ընթացքում անդրադարձավ ապրիլի 2-ին տեղի ունեցած խորհրդարանական ընտրություններին՝ ասելով, թե այժմ ունենք ոչ լեգիտիմ խորհրդարան:
«Մենք մեր գործունեությունը ցանկացած պարագայում շարունակելու ենք: Ներկայումս ունենք ոչ լեգիտիմ խորհրդարան, ոչ լեգիտիմ ձևավորված իշխանություն, որը չի կարողանալու ո՛չ մեր պետական շահը պաշտպանել, ո՛չ Արցախի հարցում առաջընթաց ապահովել, ոչ էլ տնտեսական դաշտում բարեփոխումներ իրականացնել»,-ասաց նա և նշեց, որ իրենք ևս սխալներ են ունեցել, սակայն հիմնական քաղաքական պրոցեսները դուրս են մնացել խորհրդարանից:
Ըստ նրա՝ եղավ ձայների հրապարակային աճուրդ, սև քարոզչություն՝ հատկապես իրենց դաշինքի նկատմամբ։
ՕՐՕ տեղեկատվական կենտրոնի համակարգող Հովսեփ Խուրշուդյանի խոսքով էլ՝ ակնհայտ է, որ ընդդիմությունը պարտվեց, քանի որ չկարողացավ համոզել ընտրողին, որ միասնական հակաիշխանական այլընտրանք ունի։
–ՕՐՕ դաշինքը ամեն ինչ արեց, որպեսզի լայն համախմբում հնարավոր լինի իշխանության դեմ, այդ այլընտրանքը ձևավորվի, և մարդիկ տեսնեն, որ իրենց քվեն կարող է իրական փոփոխությունների բերել,–ասել է Հ. Խուրշուդյանը։
Ասուլիսին նաև մասնակցել է «Ժառանգություն» կուսակցության ներկայացուցիչ, ընտրական հանձնաժողովի նախագահ Հրայր Ավանեսյանը, ով նշել է.
–Մատնահատեքերը շատ հեշտ է դնել և համեմատել, քանի որ այն թվային որոշակի հաջորդականություն է, որը պարունակում է որոշակի ինֆորմացիա մարդու մատնահետքի մասին՝ քանի կետ կա, քանի վերջավորություն, քանի կոր։ Կարելի է շատ արագ իրականացնել համապատասխան համեմատությունը և ասել՝ քանի կրկնություն է եղել։
Ինչ վերաբերում է Երևանի ավագանու ընտրություններին, ապա դաշինքը դեռ մտածում է՝ մասնակցի՞, թե՞ ոչ։ Մարտիրոսյանը, սակայն, նշեց, որ իր անձնական կարծիքով, դաշինքը չպետք է մասնակցի քաղաքապետի ընտրություններին։ «Դեռևս քննարկումների փուլում է։ Իմ անձնական կարծիքը՝ կարծում եմ, որ պետք չէ մասնակցել, մեր ժողովուրդը մի հատ էս իրավիճակը թող մարսի, տեսնի ինչ եղավ», - ասաց Մարտիրոսյանը։
Նշենք, որ Երևանի ավագանու ընտրությունները կայանալու են մայիսի 14-ին:
Zham.am