Եթե օրենքն ընդունվի, ապա այն քաղաքացիները, որոնց 27 տարին լրացել է, կարող են վերադառնալ ՀՀ, վճարել 2 տարվա պայմանագրային զինծառայողի աշխատավարձ. Մ. Հայրապետյան

Գործող օրենսդրության համաձայն՝ մեր բոլոր քաղաքացիների համար, որոնք գտնվում են արտերկրում և քրեական հետախուզման մեջ են բանակում չծառայելու պատճառով, միայն մի սցենար կա՝ ենթարկվել պատասխանատվության և հայտնվել բանտում: Սա մեզ ստիպեց նոր լուծումներ և տարբերակներ առաջարկել մեր այն հայրենակիցներին, որոնք ինչ- ինչ պատճառներով ժամանակի ընթացքում արտագաղթելու հետևանքով հայտնվել են սփյուռքում և նրանց 27 տարին լրացած է. լրագրողների հետ զրույցում նշեց ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը՝ խոսելով նոր նախագծի մասին:

Հիշեցնենք, որ շրջանառության մեջ է դրվել օրենքի նոր նախագիծ, համաձայն որի` 27 տարին լրացած ՀՀ քաղաքացիները, որոնք չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձ վճարելու դեպքում կազատվեն քրեական հետապնդումից:

Մխիթար Հայրապետյանի հավաստմամբ՝ նախագծի նպատակն է օգտագործել սփյուռքում եղած ռեսուրսը՝ նրանց առաջարկելով մի քանի տարբերակ: Ըստ նրա՝ եթե օրենքը խորհրդարանի կողմից ընդունվի, ապա այն քաղաքացիները, որոնց 27 տարին լրացել է, կարող են վերադառնալ Հայաստան, վճարել երկու տարվա պայմանագրային զինծառայողի աշխատավարձ, գումարած հավելավճարներ, որը նախնական հաշվարկներով կազմելու է 5-5.5 մլն ՀՀ դրամ.

«Հիմքում ոչ թե դրված է միայն ֆինանսական բաղադրիչը, այլ պատասխանատվությունը, որ նա ունի պետության հանդեպ, հետևաբար սահմանվել է այն դրույթը, որը չի ենթադրում ֆիքսված գումար: Բայց եթե ցանկություն կհայտնեն ներգրավվել զինված ուժերում, առաջիկա երեք տարվա ընթացքում զինծառայության անցնելու պարագայում հետ կստանան այդ գումարը: Երրորդ տարբերակն այն է, որ եթե գործող օրենսդրությամբ 37 տարին լրանալուն պես քրեական գործը կարճվում էր, նոր կարգավորումներով՝ ովքեր կխուսափեն զինծառայությունից, մինչև 47 տարեկանը փաստորեն իրենց վրա տարածվելու է այս օրենքը»:

Մխիթար Հայրապետյանը հստակեցրեց, որ խոսքը վերաբերում է 27 տարին լրացած քաղաքացիներին, պետք է արձանագրել նաև, որ զինակոչային տարիքը չի փոփոխվելու:

«Եթե չլինի սույն օրենքը, այդ մարդիկ շարունակելու են մնալ քրեական հետապնդման մեջ կամ հայտնվել բանտում, մենք առաջարկում ենք տալ երկրորդ հնարավորություն»,- պարզաբանեց նա:

Մանրամասները՝ Tert.am-ի տեսանյութում