«Որտեղի՞ց վարչապետի ասած 2.5 %-ի անկումը. կա՛մ բացատրեք, կա՛մ գործ ունենք աճպարարության հետ». Թադևոս Ավետիսյան

Գործող կառավարության հիմնական ուղենիշներից մեկը մշտապես եղել է՝ վիճակագրական թվերի մեջ փնտրել և գտնել դրական արձանագրում և դրա վրա կառուցել իրենց ամբողջ ասելիքը, ուստի այդ հանգամանքով է պայմանավորված այն, որ վարչապետ Փաշինյանը տնտեսության մասին խոսելիս շեշտադրում է ՀԴՄ-ների հանգամանքը, ինչը չեն կարող տնտեսության աճի կամ անկման ցուցիչ լինել, և ՀԴՄ-ն էլ նման պնդում անելու համար բավարար չէ։ 168 TV-ի «Ռեվյու» հաղորդաշարի եթերում ասաց տնտեսագետ Թադևոս Ավետիսյանը։

Ըստ նրա՝ Հայաստանի տնտեսության կայուն զարգացման համար կարևոր է իրավիճակը ճիշտ ախտորոշելը, և ոչ թե՝ այս կամ այն ոլորտի անկումը փաթեթավորել ու վերահասցեավորել այլոց։

«Մյուս կողմից ՝ Covid 19-ը չպետք է դառնա քավության նոխազ, որովհետև այնպես չէ, որ մինչև համավարակը տնտեսության վիճակը լավ էր»,- ասաց Թադևոսյանը։

Անդրադառնալով վարչապետ Փաշինյանի այն հայտարարությանը, որ Հայաստանում վերջին ամսում ՀԴՄ-ների շրջանառությունն ընդամենը 2.5 տոկոսով է նվազել, տնտեսագետը նշեց, որ չի կարող ՀԴՄ-ների շրջանառությունը նվազած լինի 2.5 տոկոսով, երբ այդ նույն ժամանակահատվածում առնվազն 15 և ավելի տոկոսով նվազել է առևտրի շրջանառությունը։

«ՀԴՄ-ի շրջանառությունը դա մանրածախ և մեծածախ առևտուրն է, բայց 2019 թվականի համեմատ՝ այս տարի մեր ծառայությունների ոլորտը կրճատվել է 9 տոկոսով, առևտրի ոլորտը՝ 10 տոկոսով, մանրածախ առևտուրը՝ 15 տոկոսով։ Հիմա անհասկանալի է, թե ինչպե՞ս կարող է այս թվերի հետ մեկտեղ՝ ՀԴՄ-ների շրջանառությունը նվազած լինի ընդամենը 2.5 տոկոսով։ Սա պատկան կառույցները պետք է բացատրեն, հակառակ դեպքում գործ ունենք աճպարարության հետ։

Ինչ վերաբերում է վարչապետի ասած աշխատատեղերի ավելացմանը, ապա անհասկանալի է, թե ինչպե՞ս կարող է շրջանառությունը կրճատվել 10 տոկոսով, բայց երկրում տեղի ունենա աշխատատեղերի ավելացում. սա տնտեսագիտական առումով անհասկանալի է, որովհետև մարդիկ բիզնես են անում շահույթ ստանալու համար, և անհասկանալի է, թե ինչպե՞ս կարող են իրենք աշխատավարձին ուղղվող ծախսերն ավելացնել, եթե իրենց շահույթը նվազել է։ Սա էլ, որ պատկան կառույցները ևս պետք է բացատրեն»,- ասաց Թադևոսյանը՝ ընդգծելով, որ իր համար ակնհայտ է, որ ոչ թե ունենք հավելյալ մարդկանց եկամուտներ, այլ թերզբաղվածության աճ, երբ մեկ աշխատատեղը բաժանել են մի քանի աշխատողների միջև՝ դրանով նվազեցնելով մարդկանց եկամուտները, իսկ դա բերելու է աշխատող աղքատների թվի ավելացման։ Հիմա, երբ թերզբաղվածությունը խորանա, մենք ունենալու ենք ոչ թե՝ նպաստից դեպի աշխատանքի խթանում, ապա՝ ճիշտ հակառակը, եթե պետք է աշխատեն ու ստանան նպաստի չափ գումար, ապա չեն աշխատի, այդ նպաստը կստանան և արդեն կանցնեն ստվերային զբաղվածության։ Ինձ համար ակնհայտ է, որ ներկայացված թվերը չեն արտահայտում իրական պատկերը»,- ասաց մեր զրուցակիցը։

Խոսելով տնտեսության տարբեր ճյուղերում արձանագրված տնտեսական անկմանը զուգահեռ՝ պետական ապարատում աճող աշխատավարձերի ավելացման մասին՝  տնտեսագետը նշեց, որ այն աճել է 8 և ավելի տոկոսով պետական հատվածում, իսկ ոչ մասնավոր հատվածում՝ աճը կազմում է 2 տոկոսից ավելին։

«Այս բարձրացման առյուծի բաժինը կազմում են պարգևավճարները, բայց հարց է առաջանում՝ պարգևատրվում են, որ ի՞նչ անեն, լավ ձախողելու համա՞ր են պարգևատրվում»,- նկատեց Թադևոսյանը՝ շեշտելով, որ հակառակ պարգևավճարների՝ մենք ունենք 55 միլիարդ դրամով հարկային եկամուտների նվազում, որին ավելանում է նաև 163 միլիարդ դրամ, որ լրացուցիչ ծախսվել է՝ համավարակով պայմանավորված, ակնհայտ է դառնում, որ դա բերելու է պահուստային ֆոնդի ծանրաբեռնման։

Ըստ տնտեսագետի՝ ստեղծվել է մի իրավիճակ, որ կառավարության ամբողջ տնտեսական զարգացման տեսլականը հիմնվել է բացառապես ճանապարհաշինության վրա, իսկ դա իր բացատությունն ունի՝ պոպուլիզմի տեսակետից շատ ավելի նպատակահարմար է։

Հարցազրույցի մանրամասները՝ տեսանյութում