«Պետք չէ համաշխարհային բեմում Շվարցենեգեր խաղալ». Լավրովը Նավալնիի թունավորման գործով հակադարձել է Պոմպեոյին

Ռուսաստանի արտաքին գործերի նախարար Սերգեյ Լավրովն «անհիմն» է բնորոշել ռուս ընդդիմադիր գործիչ Ալեքսեյ Նավալնիի թունավորմանը Ռուսաստանի բարձրաստիճան պաշտոնյաների մասնակցության մասին ԱՄՆ պետքարտուղար Մայք Պոմպեոյի հայտարարությունները և նշել է, որ «ամերիկացի գործընկերներն իրենց օրենքից վեր են դասում, եթե կարծում են, որ պետք է իրենց խոսքին հավատալ»: Այս մասին գրում է interfax.ru կայքը: Փոխանցում է Tert.am-ը։ 

«Նույնիսկ այն ժամանակ, երբ Առնոլդ Շվարցենեգերն ասում էր «Trust me» («վստահիր ինձ»), նրան վստահելու շանսերն ավելի շատ էին, քան նրանք, ովքեր փորձում են համաշխարհային բեմում Շվարցենեգեր խաղալ»,-ասել է ՌԴ արտգործնախարարը Մոսկվայում կայացած մամուլի ասուլիսի ժամանակ:

Պոմպեոն ռադիոեթերում մեկնաբանել է, թե ինչպես է աշխարհում ընկալվում Նավալնիի հետ կապված միջադեպը: Նրա կարծիքով, մարդիկ հասկանում են, թե ինչ է տեղի ունենում, տեսնում են «այլախոհին թունավորելու փորձ» և «ընդունում են, որ կա մեծ հավանականություն, որ դա Ռուսաստանի բարձրաստիճան պաշտոնյաների կողմից է եղել»:

«Մենք սովոր ենք անհիմն մեղադրանքների: Եվ երբ Գերմանիայի կառավարության պաշտոնական ներկայացուցիչը հայտարարում է, որ Ռուսաստանի գլխավոր դատախազության հարցումը փոխանցվել է արդարադատության անկախ մարմիններին, և հետևաբար, գերմանական կառավարությունն այլևս ոչինչ չի կարող անել, բայց միևնույն ժամանակ մեզանից պահանջում է հետաքննություն անցկացնել, դա հիշեցնում է այն նախադեպերը, որոնք ստեղծվել են մեր արևմտյան գործընկերների կողմից`Սոլսբերիում թունավորումից հետո, և կրկնում է այն պատմությունը, որը ստեղծվել էր մալայզիական Boeing- ի ողբերգության ժամանակ»,-նշել է Լավրովը:

Նա հիշեցրել է, որ այս դեպքերում Ռուսաստանը չի հրաժարվել հետաքննության հետ համագործակցելուց և տվել է անհրաժեշտ տեղեկությունները:

«Մեզ այսպես պատասխանեցին. mենք ռուսական կողմից համագործակցություն ասելով` նկատի ունենք ձեր մեղքը ընդունելու անհրաժեշտությունը: Եթե հիմա նույն տրամաբանությունը գերիշխում է մեր արևմտյան գործընկերների, առաջին հերթին ՝ գերմանացիների և ամերիկացիների մոտ նույնպես, դա միայն հաստատում է, որ իրենք իրենց վեր են դասում օրենքից, իրենց վեր են դասում բոլորից, բոլորը հավասար են, բայց նրանք ավելի հավասար են, քանի որ նրանց խոսքին պետք է հավատալ»,-եզրափակել է ՌԴ արտգործնախարարը:

Հիշեցնենք, որ Նավալնիի ինքնազգացողությունը կտրուկ վատացել էր օգոստոսի 20-ին Տոմսկից Մոսկվա թռչելիս: Նրան տեղափոխող ինքնաթիռն արտակարգ վայրէջք էր կատարել Օմսկ քաղաքում, ուր նրան հոսպիտալացրել են շտապ օգնության թիվ մեկ հիվանդանոց: Հիվանդանոցի մասնագետները Նավալնիի օրգանիզմում թույնի հետքեր չէին հայտնաբերել: Ըստ նրանց՝ հետազոտությունները միայն ալկոհոլի և կոֆեինի հետքեր են ցույց տվել: Հայտնի է, որ չվերթից առաջ Նավալնին թեյ է ըմպել օդանավակայանի սրճարանում: 

Օգոստոսի 22-ին Նավալնիին ինքնաթիռով տեղափոխել են Բեռլինի Charite հիվանդանոց, որի մասնագետներն ավելի ուշ հայտարարել էին վերջինիս թունավորման մասին, իսկ Գերմանիայի զինված ուժերի մասնագետները մաշկի, արյան և մեզի նմուշների մեջ «Նովիչոկ» խմբին պատկանող թունավոր նյութի հետքեր էին հայտնաբերել:

Աղբյուր՝ Tert.am