Ամուլսարի համայնքների խնդիրը` աշխատատեղերի բացակայություն և արտագաղթ. Տեսանյութ

Ամուլսարի ճանապարհների ապօրինի շրջափակումն Ամուլսարի հարակից համայնքների բնակիչներից խլել է ոչ միայն օրինական աշխատանքը, այլև Ամուլսարում չաշխատող, բայց Ամուլսարի ծրագրի շնորհիվ այլ եկամուտի աղբյուր ունեցող բնակիչների եկամուտի հնարավորությունները։

Երկու տարվա ապօրինության հետևանքով համայնքներում 400-ից ավելի մարդ կորցրել է աշխատանքը, ավելի քան 500 մարդ արտագաղթել է, և փակվել է առնվազն 28 բիզնես՝ խանութներ, փոքր արտադրամասեր, սպասարկման ծառայություններ։ Այս բիզնես ծրագրերի մեծ մասը սոցիալական ծրագրերի շրջանակներում համայնքի բնակիչներին աջակցել էր հիմնել «Լիդիան Արմենիան»։

2008-2018 թվականների ընթացքում «Լիդիան Արմենիան» Ամուլսարի հարակից համայնքներում սոցիալական ծրագրերում ներդրել էր մոտ 3,5 միլիոն ԱՄՆ դոլար։ Ամուլսարի շինարարության ընթացքում շրջակա համայնքներում հիմնվել էր մոտ 50 փոքր բիզնես։ Երկու տարվա ապօրինության հետևանքով այդ բիզնեսների մեծ մասը փակվել է, սոցիալական ծրագրերը դադարեցվել են։

Անցյալ շաբաթ «Լիդիանը» հանդիպում անցկացրեց Վայոց Ձորում Գորայք, Սարավան, Գնդեվազ և Ջերմուկ համայնքներում բիզնես ծրագրերում նախկինում ներգրավված համայնքի բնակիչների հետ՝ քննարկելու աշխատանքների վերսկսմանը զուգահեռ սոցիալական ծրագրերի վերսկսման հնարավորությունները։ Համայնքի բնակիչները շեշտում էին, որ հիմնական խնդիրը շարունակում է մնալ աշխատատեղերի բացակայությունը և արտագաղթը։ Մարդիկ, որ դեռ երեք տարի առաջ բիզնես էին հիմնել այն հույսով, որ Ամուլսարի ծրագրի շնորհիվ տնտեսական շարժը հնարավորություն էր տալու բարվոք ապրել սեփական համայնքում, այսօր չգիտեն` ինչպես փակել վարկերը և ինչ հույսով մնալ համայնքներում։

«Լիդիան Արմենիա»