Իշխող ուժը չի մարսելու ու շատ ծանր է վճարելու «Լանզարոտեի կոնվենցիան» վավերացնելու ապազգային քայլի համար․ Չախալյան. Տեսանյութ

Սորոսի ավերիչ գործընթացներն ինձ համար նորություն չէին։ Երբ 2015-ին «Գազել»–ներով Վրաստանից սահման էին հատում ու մի խումբ մարդիկ սահմանին վրաններ էին խփում, արդեն երևում էր, որ մենք մտահոգվելու տեղ ունենք, քանի որ այդ մարդիկ մեր երիտասարդներին սովորեցնում էին տխրահռչակ հեղափոխական գաղափարներ։

Այս մասին «Արմնյուզ» ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «ԿԱՄՔ» հասարակական նախաձեռնության շարժման համահիմնադիր Վահագն Չախալյանը՝ անդրադառնալով ազգային արժեքների պահպանման համար իրենց նախաձեռնած բողոքի ակցիաներին։

Ըստ Վահագն Չախալյանի, եթե երկու տարի առաջ «ԿԱՄՔ»-ը չսկսեր իր գործունեությունն, այսօր պատկերը շատ ավելի ծանր էր լինելու․ «Ցավոք, մենք վերջին օրը իմացանք, որ «Լանզարոտեի կոնվենցիան» գալիս է խորհրդարան, դրա համար էլ չկարողացանք այնպես անել, որպեսզի այն չվավերացվի։ Դուք տեսաք, որ մեր պայքարի շնորհիվ հետաձգվեց «Ստամբուլյան կոնվենցիան»»։

Վահագն Չախալյանը համոզված է, որ իշխող ուժը չի մարսելու ու շատ ծանր է վճարելու «Լանզարոտեի կոնվենցիան» վավերացնելու ապազգային քայլի համար։

Հաղորդման մյուս հյուրը՝ նախկին պատգամավոր Արագած Ախոյանն էլ իր հերթին նշում է, որ, եթե հանկարծ «Ստամբուլյան կոնվենցիան» փորձեն աշնանը վավերացնել, ապա շատ կոշտ դիմակայության են հանդիպելու․ «Ուզում եմ մեր ժողովրդին զգուշացնել, եթե ձեզ թվում է, որ այս կոնվենցիաները ձեզ ու ձեր երեխաներին չեն վերաբերում, ապա շատ սխալվում եք։ Պետք է ոտքի կանգնել ժողովուրդ»։

Արագած Ախոյանը, անդրադառնալով ԿԳՄՍ նախարար Արայիկ Հարությունյանին «աղբամանը» գցելու բողոքի ակցիաներին, նշել է․ «Մենք շատ ցիվիլ ձևով Արայիկ Հարությունյանին գցեցինք աղբամանը։ Շատերը հարցնում են, բա ինչո՞ւ միայն Արայիկ Հարությունյանը, էլի պաշտոնյաներ կան, մենք ասում ենք՝ սա մեր կողմից քարտ է իշխանությանը»։

Հարցին՝ շատերը լուրջ չեն վերաբերվում նմանատիպ ակցիաների, քանի որ մի քանի անգամ ձախողվել են նմանատիպ ակցիաներն ու նույն Արայիկ Հարությունյանը հրաժարական չի տվել, Վահագն Չախալյանը պատասխանել է․ «Դուք դա հիշում եք, բայց չեք հիշում, որ Հրապարակի մետրոյում «Հուզանք ու զանգ» ներկայացումը ցուցադրեցին, որից հետո մենք պահանջում էինք Արևիկ Անափիոսյանի հրաժարականը ու նա արդեն նախարարությունում չէ»։

Ըստ Չախալյանի՝ մեզ համար նախարարի հրաժարականը պարտադիր չէ, մենք պարզապես ուզում ենք, որպեսզի ԿԳՄՍ նախարարն ականջալուր լինի մասնագետներին։

Արագած Ախոյանն էլ նշում է, որ իրենց ավտոերթերը՝ Արայիկ Հարությունյանի նկարը աղբամանում ակցիաներին մարդիկ շատ լավ են վերաբերվում ու մոտենում են իրենց ու ասում՝ փրկեք մեզ։