Եթե Արման Բաբաջանյանի՝ հայ և եզդի ժողովրդի միջև թշնամանք հրահրող հայտարարությանը արձագանք չլինի, կարող ենք ընդունել, որ դա նաև իշխանությունների հայտարարությունն է. Բորիս Մուրազի

Ուզում եմ անդրադառնալ ԱԺ պատգամավոր Արման Բաբաջանյանի հայտարարությանը, որն իր խոսքում վիրավորել էր հայերին և եզդիներին, անհասկանալի էր այդ գրառման նպատակը, թե ինչո՞ւ պետք է ինչ-որ փոսեր լցվեն հայերի և եզդիների ատամներով, որոնք իրենք են փշրելու. այս մասին հրավիրված ասուլիսին հայտարարեց Politik.am կայքի գլխավոր խմբագիր, ազգությամբ եզդի Բորիս Մուրազին: Հաղորդում է Tert.am-ը։ 

«Մենք այդ հարցով դիմում ենք ներկայացրել ԱԺ խմբակցություններին, մասնավորապես, ԼՀԿ և ԲՀԿ-ին, ինչպես նաև ԱԺ նախագահ Արարատ Միրզոյանին:

Արձագանք եղել է միայն ԲՀԿ-ից: Ասել են՝ այս պահին դիմում չի լինի, որովհետև ընթացակարգ կա, որ իշխանությունները կարող են խանգարել»,- ասաց նա:

Մուրազին նշեց, որ իրենք կսպասեն նրան, որ իշխանությունը նախաձեռնությամբ հանդես գա, որ էթիկայի հանձնաժողով ստեղծվի, քանի որ ԱԺ-ում այդպիսի հանձնաժողով չի գործում, և այդ ժամանակ կդիմեն:

«Այս խնդիրը ևս մեկ անգամ ցույց է տալիս իշխանությունների երկակի մոտեցումները: Ես հիշեցնեմ, որ Սորոսի գրաասենյակի ղեկավար Լարիսա Մինասյանը դիմել էր Ալեն Սիմոնյանի հարցով էթիկայի հանձնաժողով ձևավորելու խնդրանքով, դրան արձագանքեցին իշխանական շատ պատգամավորներ, իշխանական լրատվամիջոցներ, բայց օրինակ իշխանության հովանու ներքո գտնվող անկախ պատգամավորի ազգամիջյան թշնամանք հրահրող այդ հայտարարությանը որևէ արձագանք չեղավ:

Ես կարծում եմ՝ եթե ի վերջո էթիկայի հաանձնաժողով չձևավորվի և իշխանություններն իրենց մեծամասնությամբ, որ ներկայացված է ԱԺ-ում, Արման Բաբաջանյանի այդ հայտարարությանը գնահատական չտան, մենք կարող ենք ընդունել, որ դա նաև իշխանությունների հայտարարությունն է և իրենք միանում են դրան»,- ասաց նա:

Հիշեցնենք, որ Արման Բաբաջանյանն իր ֆեյսբուքյան էջում գրել էր. «Ձեր գլուխների վրայով կանցնենք ճանապարհը մեր, ձեր ատամներով կլցնենք փոսերն այդ ճամփի, ձեր մարմիններին կափսոսենք մեր ոտքերը սրբել, բայց կանցնենք մեռնելով ապրելու ճանապարհը մեր երկրի: Ու թող մեկը կասկածի, թող մեկը կասկածի հայ լինի, թե եզդի»:

Աղբյուր՝ Tert.am