Կառավարությունն առաջարկում է ներդնել ծախսերի հայտարարագրման նոր համակարգ

ՀՀ կառավարությունը նախաձեռնել է փոփոխություններ և լրացումներ կատարել «Հանրային ծառայության մասին» օրենքում։ 

ԱԺ պետաիրավական հանձնաժողովի նիստի ժամանակ ՀՀ արդարադատության նախարար Ռուստամ Բադասյանը ասաց, որ նախագիծը հակակոռուպցիոն ոլորտում իրականացված քայլերի տրամաբանական շարունակությունն է։

«Հայտարարատուի ֆինանսական շարժի վերաբերյալ ամբողջական պատկերացում կազմելու նպատակով առաջարկվում է ներդնել ծախսերի հայտարարագրման նոր համակարգը։ Ծախսերի հայտարարագրման տեսանկյունից նախագծով որդեգրվել է հետևյալ մոտեցումը. որոշակի կոնկրետ ծախսերի դեպքում անձը պարտականություն է կրում այն հայտարարագրելու, եթե այդպիսի ծախսի միանվագ արժեքը գերազանցում է 1 մլն ՀՀ դրամը։ Այդպիսի ծախսերի թվին են դասվում օրինակ վարձակալության հետ կապված կատարված ծախսերը, ուսման վարձավճարները, հանգստի համար ճանապարհածախսի, կեցության համար կատարված ծախսերը»,-ասաց Ռուստամ Բադասյանը։

Նախագծով նաև սահմանվել է դրույթ այն մասին, որ հայտարարագրման է ենթակա ցանկացած այլ ծախս, եթե դրա միանվագ արժեքը գերազանցում է 2 մլն ՀՀ դրամը կամ դրան համարժեք արժույթը. «Բացի այդ, նախատեսվում է որպես հայտարարագրման ենթակա գույք սահմանել նաև հայտարարատուի կողմից փաստացի տիրապետվող գույքը։ Այստեղ կրկին եկու մոտեցում է ցուցաբերված՝ մի դեպքում շահառուի կողմից փաստացի վերահսկվող գույքն է հայտարարագրվում, մյուս դեպքում՝ փաստացի տիրապետվող գույքը։ Փաստացի տիրապետվող գույք է համարվում հայտարարատուի կողմից տիրապետվող, բայց նրան չպատկանող գույքը՝ անշարժ գույք, տրանսպորտային միջոց։ Իսկ փաստացի վերահսկվող է այն գույքը, որը պատկանում է նրան»,-հավելեց նախարարը։

Աղբյուր` Փաստինֆո