Այսօր մենք ստեղծել ենք քաղաքական պայքարի բավականին լուրջ գործիք, ստեղծվել է բավականին լավ, ֆունկցիոնալ թիմ». Քոչարյանը` քաղաքականություն վերադարձի մասին. Տեսանյութ

ՀՀ երկրորդ նախագահ Ռոբերտ Քոչարյանը բացառիկ հարցազրույց է տվել ռուսական РБК հեռուստաալիքին: Լրագրողը հարցրել և ստացել է Հայաստանի երկրորդ նախագահի տեսակետները քաղաքականություն վերադարձի, «թավշյա հեղափոխության» պատճառների, Բելառուսում իրավիճակի, Ադրբեջանի հետ հակամարտության, Արցախի խնդրի կարգավորման, Սերժ Սարգսյանի, Հայաստանի տնտեսության ու առաջիկա ծրագրերի մասին:

«Զբաղվում եմ քաղաքականությամբ, հարցազրույցներով, ինչպես նաև տարբեր հոբբիներ` սպորտ, ընթերցանություն, աշխատում եմ երկրորդ գրքիս վրա, որի սյուժեն դեռևս ավարտված չէ... Ես արդեն ունեմ իմ առաջին ինքնակենսագրական գիրքը, որով ամփոփել էի իմ քաղաքական կյանքը` հեռանալով նրանից, ինչպես ինձ էր թվում, ընդմիշտ: Սակայն քաղաքականությունն ինքը վերադարձավ ինձ մոտ, և երկրորդ գիրքը կլինի շարունակության, վերադարձի և այն ամենի մասին, ինչ կատարվում է հիմա», -  ասաց Ռոբերտ Քոչարյանը, պատասխանելով լրագրողի այն հարցին, թե ինչով է զբաղվում ՀՀ երկրորդ նախագահն այժմ:

Լրագրողը նախկին նախագահից հետաքրքրվել է, թե ինչ է արվել այս երկու տարիներին` սկսած այն պահից, երբ Ռ. Քոչարյանը հայտարարեց քաղաքականություն վերադարձի մասին, ինչին ի պատասխան ՀՀ երկրորդ նախագահն ասել է. «Ես քաղաքականությունից, պաշտոնից հեռացել էի մեծ համոզմամբ, որ հեռանում եմ ընդմիշտ՝ մտադիր լինելով զբաղվել մի ավելի հետաքրքիր, նոր բանով: Սակայն շրջադարձը կյանքում կտրուկ էր: Ստիպված եղա ամեն ինչ զրոյից սկսել: Այսօր մենք ստեղծել ենք քաղաքական պայքարի բավականին լուրջ գործիքներ: Ստեղծվել է բավականին լավ, ֆունկցիոնալ թիմ` բավականին լավ ներկայացված լրատվական դաշտում, սոցիալական ցանցերում: Դրանք այն գործիքներն են, առանց որոնց այսօրվա պայմաններում քաղաքական պայքար հնարավոր չէ: Դրա վրա 1,5-2 տարի ծախսվեց»:

Մանրամասները՝ կից տեսանյութում: