Կոմիտասի արձանի պղծումը ծայրահեղական «Գորշ գայլեր»-ի քաղաքականությունն է. Կարեն Խուրշուդյան

Այսօր հայտնի դարձավ, որ Փարիզի կենտրոնական թաղամասում, բոլոր խաչմերուկների սրտում գտնվող՝ Հայոց ցեղասպանության խորհրդանիշ հանդիսացող Կոմիտաս վարդապետի հուշարձանը պղծվել է։ Այդ մասին Հայաստանում Ֆրանսիայի դեսպանությունն արդեն խստորեն դատապարտող գրառում է կատարել՝ մասնավորապես շեշտելով. «Հայաստանի դեսպանությունը խստորեն դատապարտում է Փարիզում Կոմիտաս Վարդապետի արձանի պղծումը, որը ժխտողականության դրսևորում է, մի հուշարձանի, որը նվիրված է Հայոց ցեղասպանության նահատակների, ինչպես նաև Ֆրանսիայի համար զոհված հայերի հիշատակին»։

Yerkir.am-ի հետ զրույցում Մարսելի Խաչատուր Աբովյանի անվան հայկական վարժարանի նախագահ ԿԱՐԵՆ ԽՈՒՐՇՈՒԴՅԱՆԸ, որը համայնքում հայկական հարցերով զբաղվող ակտիվ  անդամ է, ասաց, որ սա ծայրահեղական «Գորշ գայլեր»-ի ձեռագիրն է: «Հայոց ցեղասպանության խորհրդանիշ հանդիսացող Կոմիտասի արձանի պղծումը Թուրքիայի կառավարության հրահանգներով իրականացվող, ինչպես նաեւ ֆինանսավորվող վանդալիզմներից է, որոնք նպատակ ունեն խաթարելու Ֆրանսիայում Հայոց ցեղասպանության ինֆորմացիայի տարածումը։ Կոմիտասի արձանի պղծումը ծայրահեղական «Գորշ գայլեր»-ի քաղաքականությունն է, որին Ֆրանսիայի հայկական կազմակերպությունները համակարգող  խորհուրդն արդեն անդրադարձել է՝ շեշտելով, որ այս բոլոր արարքների հետեւում կանգնած է Թուրքիայի կառավարությունը»,- ասաց Կ․ Խուրշուդյանն ու այս ամենը բնորոշեց այսպես. «Նման գործողությունները ծառեր են, որոնք անտառ են թաքցնում»։

Զրուցակիցը նաեւ տեղեկացրեց, որ Ֆրանսիայի տարածքում հայկական սրբավայրերի կամ հուշարձանների պղծման դեպքեր վերջին տարիներին հաճախ են գրանցվել: «Թեև նման դեպքեր շատ են գրանցվել, որ պղծվում կամ վնասվում են Հայոց ցեղասպանության հուշարձանները, բայց Մարսելում դեռեւս կենտրոնական հուշարձաններ չեն պղծվել։ Օրինակ՝ Լիոնում վեց անգամ արձանագրվել է նման դեպք, վերջինը 2020 թվականի մարտի 14-ին էր։ Դրանից առաջ՝ 2019 թվականի դեկտեմբերի 9-ին, Բանդոլ քաղաքի հուշարձանը։ Իսկ 2017 թվականի նոյեմբերին Վիեն քաղաքում երկու անգամ է պղծման դեպք անձանագրվել՝ նոյեմբերի 2-ին եւ 4-ին։ Իսկ 2014 թվականին հուլիսի 3-ին էլ Վիլորբան քաղաքում»,- նշեց նա:

Այնուամենայնիվ, Կ․ Խուրշուդյանի հաղորդմամբ, Փարիզի քաղաքապետ Անն Իդալգոն հայամետ է ու հնարավորինս արագ քայլեր կձեռնարկի արձանի մաքրման աշխատանքներ իրականացնելու համար։ Բայց, ըստ նրա, այս վանդալիզմի կողքով պետք չէ անտարբեր անցնել: «Այս պղծման դեպքը, որպես այդպիսին, անիմաստ չէ, սա մեծ նշանակություն ունի, նրանք ուզում են պատմությունը գրել իրենց ուզած ձեւով, բայց այս անգամ՝ ոչ թե թուրքերենով ու իրենց երկրում, այլ ուզում են այդ ձեռագիրը շարունակել Եվրոպայում՝ տարբեր լեզուներով, ֆրանսերենով՝ Ֆրանսիայում, գերմաներենով՝ Գերմանիայում եւ այլն»,- ասաց Կ. Խուրշուդյանը։

Նա համոզված է, որ Կոմիտասի արձանի պղծման դեպքն ուղիղ կապ ունի ոչ միայն տավուշյան վերջին դեպքերի հետ, այլ նաեւ 3 կարեւոր ուղղությունների: «Առաջինը՝ Թուրքիայի ներգրավվածությունը եվրոպական կյանքում։ Երկրորդը՝ Թուրքիայի ստրատեգիական հարաբերությունների կարգավորումը Եվրոպայում եւ աշխարհում՝ փոքրիկ «զզվեցնող» քայլեր իրականացնելով թուրք ծայրահեղականների կողմից։ Ընդ որում, նրանցից մեկին տավուշյան դեպքերի կապակցությամբ ատելություն քարոզելու համար հիմա Ֆրանսիայում պետք է դատեն։ Եվ երրորդ ուղղությունը՝ որ պանթյուրքիզմն իրականացնի  համաթուրքական քաղաքականություն, այսինքն՝ ջնջի պատմությունը եւ, Ադրբեջանի հետ եղբայր դառնալով, Արցախը վերցնի մեզնից ու մերժի Ցեղասպանությունը։ Ինչպես նաեւ աշխարհում ունենա իր ստրատեգիական ֆինանսական կարեւորագույն խարիսխները՝ հունական կղզիներում, Լիբիայում, Եվրոպայում գրավելով կարեւորագույն տեղ։ Իսկ Եվրոպայում ոչ միայն գրավում է կարեւորագույն տեղ, այլև սադրում է կառավարություններին՝ ասելով՝ եթե ինձ չտաք այսքան միլիարդ, ապա այսքան էմիգրանտ կուղարկեմ ձեզ։ Դառնալով միգրանտների զսպող սահմանը, որպեսզի նրանց չլցնի Եվրոպա, միլիարդներ է կորզում եվրոպական բյուջեներից, որն արդեն հասել է 6 միլիարդի»,- արձանագրեց Խուրշուդյանն ու, անդրադառնալով այս տարվա հուլիսին Ֆրանսիայում «Գորշ գայլեր»-ի կողմից իրականացված՝ ատելության կոչերով ցույցերին, մանրամասներ ներկայացրեց. «Ահմեդ Սեթինը 2020 թվականի հուլիսին իր աջակիցների հետ, Թուրքիայի կողմից Ադրբեջանին տված օգնության հետեւանքով, Ֆրանսիայում ցույցեր իրականացրեց։ Ծայրահեղական «Գորշ գայլեր»-ի միջոցով ռասայական ատելություն պարունակող արտահայտություններ արեցին, որի համար հիմա հայ համայնքը եւ կազմակերպությունները դատի են տվել այդ տղային՝ ռասայական ատելություն տարածելու համար։ Մեր ունեցած տեղեկություններով՝ Էրդողանը 5 ժամանոց անձնական ժողով է անցկացրել, որպեսզի աշխարհում ոչնչացնի հայկական հարցի  ակտիվիստներին՝ սկսած Եվրոպայից։ Ֆրանսիայի հայկական կազմակերպությունները համակարգող խորհուրդն իր անհանգստությունն է արտահայտում Թուրքիայի նախագահի կողմից ղեկավարվող այս քայլի կապակցությամբ»։

Բանախոսի դիտարկմամբ՝ ֆրանսիական հասարակությունը միամիտ չէ, եւ բոլորը, այդ թվում՝ բարձրաստիճան այրերն ու լրատվամիջոցները, դատապարտում են Թուրքիայի ամբիցիաները, նույնիսկ՝ Սուրբ Սոֆիայի տաճարը մզկիթի վերածելու քայլը: «Սբ Սոֆիայի տաճարը մզկիթի վերածելով՝ Թուրքիան ոչ միայն մարտահրավեր նետեց ողջ աշխարհին, այլև ռեալ քայլերով ապացուցեց, որ իրականացնում է պանթյուրքիզմ, որի հետեւանքով ուզում է՝ ամեն գնով թուրքերը տեղական իշխանության մարմիններում հստակ պաշտոններ զբաղեցնեն, դառնան պատգամավորներ եւ ռեալ կերպով ներգրավվեն եվրոպական կյանքում։  Օրինակ՝ երեկ Բունդեսթագի դիմաց դիմակ կրելու եւ կորոնավիրուսի դեմ պայքարի հակաքարոզի ընթացքում ամենամեծ ծածանվող դրոշը Թուրքիայինն էր, այսինքն՝ այս պետությունն ամեն գնով գնում է ստաբիլության դեմ։ Իսկ Սուրբ Սոֆիայի տաճարը մզկիթի վերածելն ինքնին  մեծ սադրան է Եվրոպայի եւ մարդկության հանդեպ, դրանով նա քայլում է քրիստոնյաների հետքերի վրայով։ Ամեն գնով տարածելու է  իր համաթուրքական ծրագիրը, որպեսզի կարողանա համաշխարհային քաղաքականության մեջ ունենալ դեր, որպեսզի օգտվի Միջերկրական ծովի ափերից, գազից, նավթից, Հունաստանից կղզիներ գողանալուց, չհաշված՝ Լիբիայում իր զբաղեցրած դիրքից։ Այսինքն՝ ամեն գնով փորձում է խաղալ երկու պարանների վրա, որպեսզի ավելի շատ իր շահը գործադրի։ Ֆրանսիայի նախկին եւ ներկայիս իշխանությունները, ինչպես նաեւ մի շարք կուսակցությունների ղեկավարներ ու հասարակական, քաղաքական գործիչներ դատապարտում են ծայրահեղական թուրքերի կողմից իրականացվող գործողությունները հայկական համայնքի եւ, առհասարակ, հայերի նկատմամբ, որոնք ատելություն են սերմանում եւ հայկական համայնքը վերցրել են թիրախի տակ։ Ինչպես նաեւ՝ համայնքում եղած ակտիվ անձանց, որպեսզի, այսպես ասած, Թուրքիայի ղեկավարության կողմից եկող քաղաքականությունն իրականացնեն։ Սա Էրդողանի վարած ռեալ քաղաքականությունն է Ադրբեջանի կողմից տավուշյան դեպքերից հետո։ Հայ համայնքի խնդրանքով հարցը Ֆրանսիայի կառավարության ուշադրության կենտրոնում է պահվում»,- հայտնեց Կարեն Խուրշուդյանը։

Yerkir.am