Հայաստանի համար խիստ վտանգավոր սկանդալ կարող է զարգանալ հարևան Վրաստանում

Այս օրերին Վրաստանում  Հայաստանի համար խիստ վտանգավոր սկանդալ կարող է հասունանալ կապված ոմն Թամար Բաչալիաշվիլու հանկարցակի մահվան հետ: Ըստ պաշտոնական վարկածի՝ այս 23 տարեկան աղջիկը  ինքնասպան է եղել: Մինչդեռ նրա ծնողները համոզված են, որ նրանց աղջկան սպանել են կարևոր գաղտնիք թաքցնելու համար, որի մասին իբրև տեղյակ էր Թամարը: Ըստ ծնողների վարկածի՝ իբրև իրենց աղջկան հայտնի է դարձել, թե ինչպես մի քանի բարձրաստիճան պաշտոնյաներ ծածուկ կերպով խառնված  են  եղել «ղարաբաղյան գոտի զենք մատակարարմամբ»: Զավեշտն այն է, թե,  ըստ ծնողների, իբրև  իրենց աղջկան «միլիոնավոր դոլարներ են տվել այդ ամենի մասին լռելու համար»: Ակնհայտ է, որ աղջկա ծնողների վարկածը հեքիաթային ժանրից է, քանզի «միլիոնավոր դոլարներ միայն լռելու համար» ոչ մեկին չեն տալիս: Սակայն հաշվի առնելով այն հանգամանքը, որ  սույն տարվա հոկտեմբերին Վրաստանում անցկացվելու են խորհրդարանական ընտրություններ մեծ հավանականություն կա, որ այս պատմությունը քաղաքական ուժերը շահարկեն ընդդեմ ներկայիս իշխանությունների: Եվ իզուր չէ, որ աղջկան ծնողները կոչով դիմել են Թուրքիային և Ադրբեջանին ակտիվ միջամտել այս գործին իբրև «բացահայտման» համար:

Սույն հանգամանքը ցույց է տալիս, որ գալիք վրացական ընտրություններին պատրաստվում են ոչ միայն Վրաստանի քաղաքական ուժերը,  այլև այդ ընտրություններին սպասում են  Բաքվում ու Անկարայում: Եթե հաշվի առնենք այն, որ գալիք ընտրությունների շեմին Վրաստան է պատրաստվում վերադառնալ այդ երկրի նախկին նախագահ Միխեիլ Սաակաշվիլին, ապա հաստատակամորեն կարող ենք ասել, որ երկու ամիս անց, Վրաստանը նույնպես կարող է նմանվել ներկայիս Բելառուսին: Եվ այս հանգամանքը կարող է լուրջ ազդեցություն թողնել թե ընտրության արդյունքների, և թե Հայաստանի վրա, քանզի հայտնի ուժերը ներկայիս Վրաստանի իշխանության դեմ փորձելու են ակտիվորեն աշխատացնել Թուրքիայի և Ադրբեջանի «խաղաքարտերը» որոնցից մեկի վերաբերյալ սկանդալը այսօրվանից են փորձելու ակտիվացնել:

Սա է իրականությունը:

Արտակ Հակոբյան