Հերթական չմտածված խաղն է իրավական համակարգի գլխին

Իրավական առումով որևէ կշիռ ունեցող հիմնավորում չկա, թե ինչու է անհրաժեշտ Վճռաբեկ և Սահմանադրական դատարանները վերացնել և փոխարենը ստեղծել ինչ- որ Գերագույն դատարան: Եվ հիմնավորում չտեսնելով՝ բնական և ողջամիտ է այն ենթադրությունը, որ այս ամենը քաղաքական նպատակներ ունի. Tert.am-ի հետ զրույցում նշեց փաստաբան Երվանդ Վարոսյանը՝ անդրադառնալով Սահմանադրական բարեփոխումների մասնագիտական հանձնաժողովի որոշմանը՝ բարձրագույն դատական ատյանները միավորելու և Գերագույն դատարան ստեղծելու հայեցակարգի մասին:

Երվանդ Վարոսյանը նշում է` չնայած, որ Սահմանադրական դատարանը գործել է 25 տարի, բայց շատերը ՍԴ-ի իրական գործունեության մասին ոչինչ չգիտեն: Նրա խոսքով՝ բազմաթիվ դեպքեր են եղել, երբ Վճռաբեկ դատարանը չի կարողացել իրավական ակտերին ճիշտ լուծումներ տալ, և այդ տասնյակ ու հարյուրավոր իրավական հարցերը իրենց լուծումն են ստացել ՍԴ-ի որոշումներով, իսկ նման դեպքեր այսօր էլ է պատահում, երբ ՍԴ-ն ստիպված է լինում չակերտավոր ասած՝ «ուղղել» Վճռաբեկ դատարանի սխալները.

«Իրավական առումով հետևանքները ծանր են լինելու դատարանների միավորվելու դեպքում, նման խնդիրները մնալու են չլուծված և օդից կախված: Եվ բնականաբար, լրացուցիչ մեկ ատյան, որը այդ խնդիրներին լուծում էր տալու, մենք ուղղակի չենք ունենալու, փոխարենը՝ անհասկանալի է, թե ինչ հիբրիդ են ստեղծելու մեր գլխին: Ես կարծում եմ, որ հերթական չմտածված խաղն է իրավական համակարգի գլխին, որը պետության անվտանգության տեսակետից հղի է ծանր հետևանքներով»:

Փաստաբանի կարծիքով` վերջին երկուսուկես տարիների ընթացքում նման որոշումներ կայացնող մարդիկ հիմնականում պրակտիկա և երկար տարիների աշխատանքային փորձ չունեցող անձիք են, որոնք պատրաստ են ցանկացած արկածախնդրության.

«Այդ մարդիկ մեկ օր չեն աշխատել իրավական համակարգի հետ, որ պատկերացում ունենան, թե ինչ են անում: Հանձնաժողովում տեսաբաններ են, մարդիկ կան, որոնք առհասարակ իրավունքի հետ կապ չունեն, և ուրախ եմ, որ պրոֆեսոր Արթուր Ղամբարյանը, այնուամենայնիվ, արտահայտվեց և հրապարակայնորեն ներկայացրեց, որ ինքը դեմ է քվեարկելու, ես ողջունում եմ նրա այդ քայլը»:

Դիտարկմանը, թե հաճախ է մեջբերվում ամերիկյան մոդելը, մինչդեռ, փաստաբաններն ընդգծում են, որ ՀՀ-ն Եվրոպական խորհրդի անդամ երկիր է և եվրոպական իրավունքի ընտանիքի մաս է, փաստաբանը նշեց, որ անգլոսաքսոնական իրավական համակարգի կառուցվածքը հարմարեցված է այնտեղ կիրառվող մեխանիզմներին, մեզ մոտ ամեն ինչ դասավորված է դիամետրալ հակառակ կերպով. «Մերը կոնտինենտալ իրավահամակարգ է, որն ընդունված է եվրոպական երկրների գերակշիռ մասում: Եվ պետք չէ վերցնել ամեն ինչը և հարմարացնել մի երկրի, որի իրավահամակարգն առհասարակ քոնին նման չէ»: