Երեկ, օգոստոսի 19-ին լրացավ 2006-րդ տարին, ինչ մեր հետ չէ Օկտավիանոս Գայուսևիչը Ֆուրինը, ով մեր քուչեքում առավել հայտնի է որպես Օգոստոս կայսր

Երեկ, օգոստոսի 19-ին լրացավ 2006-րդ տարին, ինչ մեր հետ չէ Օկտավիանոս Գայուսևիչը Ֆուրինը, ով մեր քուչեքում առավել հայտնի է որպես Օգոստոս կայսր։

Ու այս տխուր տարելիցի կապակցությամբ ողջ առաջադեմ մարդկությունն այս օրերին հիշում է հանգուցյալի ժառանգությունը։ Հենց Օկտավիանոսն էր, որ Եվրոպայում առաջինը մտցրեց անհատի պաշտամունքն ի դեմս իր աստվածային անձի (մինչ նա այդ գյուտը հայտնի էր միայն Արևելքում)։ Հենց Օկտավիանոսն էր, որ հորինեց պետական պաշտոնները «ժողովրդական լայն զանգվածների և սենատի թախանձագին խնդրանքներով» ժամանակավորապես ցմահ ստանձնելու սկզբունքը։ Նա նաև առաջինն էր, ում ուղեղում ծագեց դե յուրե հանրապետությունը դե ֆակտո միապետություն դարձնելու գաղափարը։ Իրավիճակին լրացուցիչ հմայք էր տալիս այն փաստը, որ Օկտավիանոսի միապետությունը ․․․ եռապետություն էր, ուստի նրան պետք էր դիմել Դուք-ով, նրա մասին խոսել Նրանք-ով, իսկ ինքն էլ դե ներկայանում էր Մենք-ով։ Այո, այո - հարգալից հոգնակին նույնպես Աստվածային Օգոստոսի ավանդն է մեզ, սիրելի փոքրիկներ։

Եվ վերջապես Օկտավիանոսը մտցրեց «նշանակովի ժառանգորդի» գաղափարը։ Այն ժամանակ այդ գաղափարը նրան հիասքանչ և խիստ առաջադեմ էր թվում․ «Որտև, եթե բիոլոգիական որդիդ ավանակի մեկն է դուրս եկել կամ վաաբշե կինարմատ է, Հռոմը հո կրակը չի՞ ընկել, այ ախպեր։ Ճիշտ մարդու վրա ես մատդ դնում ու լյոխ լյավա։» - այս պատմական ճառը նա արտասանեց եռապետների առավոտյան հավաքի ժամանակ՝ զուգարանում նստած։

Ի՞նչ իմանար Օկտավիանոսը, որ այդ իր մտահղացը փորձանք է դառնալու ոչ միայն իր սիրելի Հռոմեական Կայսրության, այլև՝ մեր սիրելի Լադիմիր Լադիմիրիչի համար։ Որովհետև Օտկավիանոսի այդ գյուտը Բյուզանդիայից Պետրոս Մեծով ժառանգություն ստացած Լադիմիր Լադիմիրիչը ինչ-որ ձև պիտի փորձի նորմալ ժառանգորդ գտնել ու մատն այդ ժառանգորդի վրա դնել նախքան ձեռքերի ծերունական դող սկսելը։ Որովհետև եթե դողից հետո դրեց, հետո սկսվելու են վեճեր, թե իրականում ում վրա դրեց, ընտեղ արդեն քաղաքացիական պատերազմա, բանա ու արանքում էլի հայերով ենք տուժելու։ Օկտավիանոս Գայուսևիչ, բա քո արածն արած է՞ր։ Մենք քեզ լավությունից բացի բան չենք արել, էն Կրասոսին էլ փուռը տվինք, կյանքդ թեթևացրինք, որ 2000 տարի հետո սենց բան բերե՞ս մեր գլխին։

Վահագն Մխոյանի ֆեյսբուքյան էջից