Արդեն 4 տարի տարածվում են միֆեր, բացարձակ ստեր` բահերով կռվող, սոված ու առանց փամփուշտի մնացած զինվորների և դիզվառելիքի փոխարեն ջրով լիցքավորված զրահատեխնիկայի մասին. Սերժ Սարգսյան. Տեսանյութ

«Ադրբեջանի համար կարևոր էր փոխել իր ժողովրդի հոգեբանության մեջ և բանակում պարտվածի բարդույթը՝ վերածելով այն ուժեղի, հաղթանակածի, և հակառակն իրականացնել Հայաստանում՝ մեր ժողովրդի հոգեբանության մեջ և բանակում հաղթանակածի հոգեբանությունը փոխել պարտվածի, թույլի հոգեբանության»,-իր ասուլիսի ներածական խոսքում նշեց ՀՀ երրորդ նախագահ Սերժ Սարգսյանը։

Ս․ Սարգսյանի խոսքով՝ Ադրբեջանի նախագահ Իլհամ Ալիևը, պատերազմով ցանկանալով բարձրացնել սեփական ժողովրդի ու բանակի մարտական ոգին և ստեղծելով ինչ-որ առասպել «հաղթանակի» մասին, անգամ կազմավորել էին հատուկ խմբեր` սպասվող հաջողություններն արագ հանրայնացնելու համար, ինչը չստացվեց` շնորհիվ մեր քաջարի մարտիկների։

Ս․ Սարգսյանը, սակայն, իր խոսքում ակնկարկեց որոշ ուժերի մասին, որոնք վերջին տարիներին ծառայել են Ադրբեջանի այս նպատակի իրագործմանը.- «Ցավալի է հետևել, թե ինչպես են վերջին տարիներին այս նպատակի իրագործմանը ծառայում որոշ ուժեր մեր երկրի ներսում։ Արդեն չորս տարի ստեղծվում և տարածվում են միֆեր, բացարձակ ստեր` բահերով կռվող, սոված ու առանց փամփուշտի մնացած զինվորների և դիզվառելիքի փոխարեն ջրով լիցքավորված զրահատեխնիկայի մասին։ Սա ուղղակի ամոթ է` նույնիսկ քաղաքական նպատակների հասնելու տեսանկյունից»,- հայտարարեց ՀՀ երրորդ նախագահ Սերժ Սարգսյանը։

***

Սերժ Սարգսյանը հրապարակեց ՀՀ ԱԺ 2016 թվականի ապրիլյան քառօրյա պատերազմի հանգամանքների ուսումնասիրության քննիչ հանձնաժողովում իր ներածական խոսքը:

***

Սերժ Սարգսյանը շոնորհակալություն հայտնեց կորոնավիրուսային համավարակի դեմ պայքարող բուժաշխատողներին:

***

Մինչ մամուլի ասուլիսի մեկնարկը ՀՀ երրորդ նախագահ Սերժ Սարգսյանը ոտնկայս հարգեց Ապրիլյան քառօրյա պատերազմում զոհված հայորդիների հիշատակը:

***

ՀՀ երրորդ նախագահ Սերժ Սարգսյանը հրավիրել է պաշտոնաթողությունից հետո իր առաջին մամուլի ասուլիսը՝ 2016 թվականի Ապրիլյան պատերազմի թեմայով, ինչպես խոստացել էր խորհրդարանում հավատարմագրված լրագրողներին՝ ս. թ. ապրիլի 16-ին ՀՀ ԱԺ քննիչ հանձնաժողովի նիստից առաջ: