Հիմնավոր կասկածի հետ կապված ձևակերպումներն անընդունելի են, բողոքարկելու ենք Երևանի ընդհանուր իրավասության դատարանի որոշումը. Ռոբերտ Նազարյանի պաշտպան
Երևանի նախկին քաղաքապետ, Հանրային ծառայությունները կարգավորող հանձնաժողովի նախկին նախագահ Ռոբերտ Նազարյանի պաշտպանները Վերաքննիչ դատարանում բողոքարկելու են Երևանի ընդհանուր իրավասության դատարանի որոշումը` հիմնավոր կասկածին առնչվող որոշ ձևակերպումների հետ կապված: Այս մասին Tert.am-ի հետ զրույցում ասաց Ռոբերտ Նազարյանի պաշտպան Գագիկ Խաչիկյանը:
«Արդյունքների հետ, իհարկե, համաձայն ենք, բայց ձևակերպումների հետ` ոչ: Հիմնավոր կասկածի հետ կապված ձևակերպումներ կան, որոնք մեզ համար անընդունելի են»,-ասաց նա:
Պաշտպանն ասաց, որ բացի ցուցմունքից` Ռոբերտ Նազարյանի մասնակցությամբ այլ քրեաիրավական գործողություն չի իրականացվել:
«Քրեական գործով կատարված գործողությունների վերաբերյալ քննիչը դատարան էր ներկայացրել բավականին մեծ փաթեթ, գործողությունների բովանդակությունը չեմ կարող նկարագրել, քանի որ նախաքննական գաղտնիք է, բայց այդ բոլոր գործողությունների հետ կապված պարոն Նազարյանի վերաբերյալ հիմնավոր կասկածի որևիցե փաստարկ չկար»,-ասաց նա:
Անդրադառնալով հարցին` նույն գործի շրջանակում ձերբակալված ՀԾԿՀ նախագահի նախկին տեղակալ Նիկոլայ Գրիգորյանը, ինչպես նաև հանձնաժողովի նախկին անդամներ Շիրազ Կիրակոսյանն ու Մուշեղ Կոշեցյանը Ռոբերտ Նազարյանին առնչվող ցուցմունք տվել են, պաշտպանն ասաց.
«Ես չեմ կարող ասել` ինչ ցուցմունք են տվել, ամեն դեպքում կրկնեմ` փաթեթի շրջանակում այն, ինչ մեզ ներկայացվել է, պարոն Նազարյանին կողմից արարք կատարելու հիմնավոր կասկածի որևիցե ապացույց առկա չէ»,-նշեց նա:
Հիշեցնենք, որ Հանրային ծառայությունները կարգավորող հանձնաժողովի նախկին նախագահ Ռոբերտ Նազարյանը ձերբակալվել էր օգոստոսի 6-ին, Երևանի ընդհանուր իրավասության դատարանը օգոստոսի 8-ին մերժել էր Ռոբերտ Նազարյանին կալանավորելու վերաբերյալ ՀՔԾ միջնորդությունը: Ռոբերտ Նազարյանին մեղադրանք է առաջադրվել ՀՀ ՔՕ 308-րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ)։
Նույն գործի շրջանակում ձերբակալվել էին նաև ՀԾԿՀ նախագահի նախկին տեղակալ Նիկոլայ Գրիգորյանը, ինչպես նաև հանձնաժողովի նախկին անդամներ Շիրազ Կիրակոսյանն ու Մուշեղ Կոշեցյանը։
Հետևեք մեզ Facebook-ում