Մինսկում բողոքի ակցիան վերածվել է ՕՄՕՆ –ի հետ բախումների․ կան տուժածներ

Մինսկի բնակիչները հավաքվել են Հաղթողների պողոտայում։ Այստեղ մեքենաների երթևեկությունը դադարեցված է։ «Մինսկը` հերոս–քաղաք» հուշակոթողից քիչ հեռու հատուկ տեխնիկա է բերվել։ Տեղում աշխատում  են իրավապահները։ Sputnik Բելառուսը հաղորդում է, որ ականատեսների վկայությամբ՝ կան մի քանի տասնյակ ձերբակալվածներ։

ՕՄՕՆ-ին (ոստիկանության հատուկ նշանակության ջոկատ)  տեսնելով` մարդիկ մի կողմ են քաշվում, այնուհետև նորից վերադառնում կոթողի մոտ։ Մինսկի բնակիչները սուլում են և վանկարկում․ «Ապրի՛ր, Բելառուս»։

Ինչպես հայտնում է թղթակիցը՝ Հաղթողների պողոտայում արդեն իսկ  ոստիկանության հետ քաղաքացիների բախում է արձանագրվել։

Ականատեսների խոսքով` իրավապահները մահակներ և պղպեղի սրվակներ են կիրառել։ Մի քանի մարդ վիրավորել է։ Քաշքշուկի մասնակիցներից մեկի գլխին ընկերները վիրակապ են դրել, սակայն նա շարունակում է մասնակցել ակցիային։

Ըստ ականատեսների` իրավապահները լուսաձայնային նռնակներ են կիրառել` հավաքվածներին վախեցնելու համար։ Իսկ նրանք իրենց հերթին փորձում են թույլ չտալ, որ մարդկանց ձերբակալեն։

Հաղթողների պողոտայի սկզբնամասում վահաններով շարվել են ՕՄՕՆ–ի աշխատակիցները։ Նրանցից հարյուր մետրի վրա պողոտան փակել են ցուցարարները։ Պողոտա է բերվում հատուկ տեխնիկա։

Միևնույն ժամանակ ՆԳՆ–ից հայտարարել են, որ հուշակոթողի մոտ տուժածների մասին տեղեկություն չունեն։

Exit poll–ի տվյալներով` Լուկաշենկոն ստացել է քվեների 79,7%–ը, Տիխանովսկայան` 6,8%–ը։

Աղբյուր՝ Sputnik Armenia