«Այս մարդիկ երկրի տնտեսությանը ու հեղինակությանը անդառնալի կորուստներ են հասցրել, հազարավոր ընտանիքների թողել են առանց ապրուստի միջոցի». Խորեն Նասիբյան

Այսօր վաղ առավոտվանից կրկին լարված էր Ամուլսարի մատույցներում: «Լիդիան Արմենիան» հեռացրել է ակտիվիստների վագոն-տնակներն Ամուլսարի մատույցներից։ Վաղ առավոտից Ամուլսարի դեմ պայքարող ակտիվիստները կոչ էին անում միանալ իրենց ու թույլ չտալ ճանապարների վերաբացումը։ Ամուլսարի դեմ պայքարողներն ավտոերթ էին կազմակերպել դեպի Ամուլսար, հանդիպելով ոստիկանության դիմադրությանը։ «Լիդիանի» իրավաբանական գծով ղեկավար Խորեն Նասիբյանից  պարզաբանում խնդրեցինք տեղի ունեցածի վերաբերյալ։

– Ի՞նչ է կատարվում Ամուլսարում, ինչո՞ւ ընկերությունը որոշեց տարհանել ակտիվիստների տնակները, արդյո՞ք ընկերության գործողություններն օրենքի շրջանակներում էին:

– Ընկերությունն արել է այն, ինչ դեռ երկու տարի առաջ պետք է աներ ոստիկանությունը։ «Լիդիանն» ունի գործունեություն ծավալելու բոլոր իրավունքները, ոչ մի լիցենզիա չի չեղարկվել, ոչ մի իրավական հիմք չկա «Լիդիանի» գործունեության խոչընդոտման համար։ Մենք երկու տարի ականատես ենք լինում մի աբսուրդ իրավիճակի, երբ մի քանի հարյուր միլիոնանոց օրինական,  կրկնում եմ, օրինական ներդրման, միջազգային հեղինակավոր բանկերի ու ֆոնդերի մասնակցությամբ ընկերության ճանապարհները ապօրինի փակում են մի խումբ մարդիկ՝ մետաղյա ջարդոններով, ու երկու տարի ոստիկանությունը անտեսելով դատարանի որոշումը, թույլ է տալիս այդ ապօրինի շրջափակումը։ Դուք ուզո՞ւմ եք ապրել մի երկրում, որտեղ ով ուզի՝ կարող է գալ ձեզ կամ մյուսին կամ մեկ այլ ընկերությանը պատկանող տարածքում վագոն-տնակ տեղադրի ու ձեզ թույլ չտա մտնել ձեր տարածք։  Հույս ունեմ, գոնե հիմա ոստիկանությունը կգործի իր լիազորությունների շրջանակում և կկանխի սադրանքի ու բռնության կոչեր անող ճանապարհ փակողների կողմից հնարավոր ապօրինի գործողությունները։

– Ի՞նչ ապօրինի գործողությունների մասին է խոսքը, ի՞նչ զարգացումներ եք սպասում։

– Արդեն երկու տարի ապօրինություն իրականացնող այս խմբակը հանդես է գալիս «համայնքի» անունից։  Այս մարդիկ երկրի տնտեսությանն ու հեղինակությանը անդառնալի կորուստներ են հասցրել, հազարավոր ընտանիքների թողել են առանց ապրուստի միջոցի, ու այս ապօրինությունը երկու տարի իրականացրել են իրավապահ մարմինների թողտվությամբ՝ հանդես գալով «ժողովրդի» անունից։ Այսօրվա իրադարձությունները ևս մեկ անգամ ցույց տվեցին, որ այս խմբավորումը «համայնքը» չի ներկայացնում։ Տեսնելով, որ մնացել են մի քանի տասնյակ հոգով, այսօր ապօրինություն իրականացնողներն արդեն բռնության կոչեր ու սադրանքներ էին հրահրում։

– Նկատի ունեք ընտանիքներով ցույցին միանալո՞ւ կոչերը։

– Նկատի ունեմ «արյունահեղության» ու «սպանության» մասին «զգուշացումները», ու նաև այն հանգամանքը, որ այսօր ամբողջ օրը ստեղծված աղմուկ-աղաղակից ու «ընտանիքի անդամներին» ներգրավելուց հետո էլ լավագույն դեպքում մի քանի տասնյակ մարդ է հավաքվել ապօրինությունը շարունակելու ու սադրանքներ հրահրելու։ Համայնքը արդեն երկու տարի սոված, հուսահատված, նստած սպասում է, թե երբ է պետությունն իրականացնելու իր պարտավորությունն այս համայնքներում ապրող հազարավոր քաղաքացիների, օրենքի ու երկրի ապագայի առաջ։

– Մինչ մենք զրուցում ենք, Ջերմուկում ավտոերթ էին կազմակերպել ակտվիստները, ու առնվազն մի քանի տասնյակ մեքենա կար մասնակից, ոստիկանության հետ բախումներ տեղի ունեցան, մի քանի մասնակցի բերման ենթարկեցին։ Դուք պնդում եք, որ համայնքը չի՞ միացել այս երթին։

– Ես պնդում եմ, որ 30 կամ 50 ու նույնիսկ 100 մարդը չեն կարող երկու տարի շարունակ ապօրինություն իրականացնել ու դա ներկայացնել «համայնքի» պայքար։ Ես պնդում եմ, որ օրենքը պետք է գործի, և այս տարածաշրջանում երկու տարի տևող անարխիան պետք է վերանա։ Ես պնդում եմ, որ ավտոերթերն արդեն երկու տարի ցուցադրաբար են կազմակերպում, ամեն մեքենայում մեկ-երկու հոգով՝ քանակի տպավորություն ստեղծելով, ու այս պայքարում երբեք այս մի քանի տասնյակ մարդուց բացի՝ այլ «համայնք» ներգրավված չի եղել։ Եթե ոստիկանությունը ժամանակին կանխեր այս սադրանքները, այսօր իրական համայնքը թշվառության շեմին չէր լինի։ Ի դեպ, այս ավտոերթերով ոչ միայն ապացուցում են, որ իրենց միացող «համայնք» չկա, այլև կես ժամ Ջերմուկից  Ամուլսարի մատույցներ քշելով ցույց են տալիս, թե ինչ հեռու է Ամուլսարը Ջերմուկից։

– Հնարավոր համարո՞ւմ եք, որ ավելի լուրջ բախումներ լինեն։

– Այս մարդիկ չեն էլ թաքցրել, որ բախումներ հրահրելու նպատակ ունեն։ «Լիդիանը» կոչ է արել համայնքների բնակիչներին չտրվել սադրանքների։ Իսկ ինչ կհրահրեն այդ մի քանի տասնյակ մեքենաների ուղևորները, արդեն ոստիկանության խնդիրն է։ Ի դեպ, համայնքի աջակցությունն ունեցողները նման սադրանքների չեն գնում։ Սադրանք անում են նրանք, ովքեր աղմուկի մեջ փորձում են թաքցնել այն հանգամանքը, որ իրենց միացող համայնք չկա։