Սրանից լավ լուծում անհնար է գտնել. Հայկ Մարությանը՝ Մաշտոցի պուրակի մասին. Տեսանյութ

Իմ ցանկություննեը շատ հաճախ բախվում են օրենքների պատնեշներին, և քանի որ հայտարարել ենք, որ մեր երկիրն օրենքով է շարժվում, անգամ եթե գիտենք՝ որոշումը լավն է, բայց օրենքը թույլ չի տալիս, մենք էլ մեզ իրավունք չենք վերապահում այդպես գործել: Այս մասին այսօր կայացած ասուլիսին հայտարարեց Երևանի քաղաքապետ Հայկ Մարությանը՝ անդրադառնալով Մաշտոցի պուրակում տեղի ունեցած ծառահատմանը:

Նա նշեց, թե այն տաղավարները, որ Մաշտոցի պուրակում պետք է կառուցվեին նախկին քաղաքային իշխանությունների օրոք, չկառուցվեցին, որովհետև հանրային ճնշում եղավ, և նախկին քաղաքապետ Տարոն Մարգարյանը թույլ չտվեց կառուցել. «Բայց կա մի սրճարան, որ Մաշտոցի պուրակում միշտ կար, որն ուներ 277 քմ սեփականության իրավունքով գրանցված տարածք, որն անձեռնմխելի է, և 17 քմ՝ որպես սեփականություն՝ որպես տաղավար: Դա իր սեփականությունն է ընդմիշտ, և մենք ոչ մի բան չենք  կարող անել դրա հետ»,-ասաց Մարությանը:

Քաղաքապետը, ներկայացնելով տարածքին առնչվող եղելությունը, ասաց, թե նախկին քաղաքապետ Տարոն Մարգարյանը 2018-ի մայիսի 16-ին ստարագրել է մի որոշում, որով մինչև այդ մոտ 380 քմ վարձակալությունը  դառնում է 1048 քմ վարձակալություն, և այն ֆիքսում է իր այդ 277 քմ սեփականությունը, վարձակալության հողի մեջ ֆիքսում է 17 քմ-ն՝ որպես գույք և այդ վարձակալությունը մինչև 2040 թ-ի դեկտեմբերն է:

Նրա խոսքով՝ երբ իրենք  եկել են իշխանության, այս խնդիրներն ի հայտ են գալիս: «Ես այս որոշումը չեղյալ եմ համարել, ասեմ ավելին՝ պայմանավորվածություն ենք ձեռք բերել, որ այդ 277 քմ սեփական գույքը և 17 քմ սեփական գույքը քանդում են, վերացնում ենք սեփականությունը, այսինքն՝ ինքն էլ սեփականատեր չի լինելու, և դրա տեղը նույն տարածքում տալիս ենք կառուցապատման իրավունքով վարձակալություն, ինչը նշանակում է, որ այն գույքը, որը նա կառուցում է, համայնքային գույք է»,-ասաց Մարությանը՝ հավելելով, թե վարձակալության ավարտից հետո գույքը դառնում է համայնքապատկան, և համայնքն է որոշում՝ քանդու՞մ է, կանաչապատու՞մ է, թե՞ գույքը տալիս է վարձակալությամբ:

«Իմ որոշմամբ՝ 1048 քմ-ն դարձրել եմ մոտ 277 քմ և 17 քմ սեփական գույքեր՝ վերացնելով սեփականության իրավունքը և՛ ֆիզիկապես, և՛ թղթերով: Սրանից լավ լուծում համայնքի համար անհնար է գտնել, եթե խոսում ենք օրենքներով: Եթե չենք խոսում օրենքով, հայտարարում ենք «բեսպրեդել» և բուլդոզերներով մտնում ենք և մարդկանց օրինական գրանցված գույքերը սկսում ենք քանդել: Հենց օրենքն այդ իրավունքն  ինձ տա, առաջինը ես կնստեմ բուլդոզեր, բայց քանի դեռ օրենքն այդ իրավունքն ինձ չի տալիս, ես օրենքի սահմաններում մաքսիմալը քաղելու եմ այս քաղաքի համար»,-ասաց նա:

Մարությանն ընդգծեց նաև, թե իր՝ քաղաքապետ դարձած օրվանից իր կողմից ամեն քայլ ուղղված է եղել Երևանը ազատելու տարբեր տիպի անօրինական շինարարություններից և ավելի կանաչ դարձնելու: «Այդպես եղել է մինչև այս պահը, հիմա է և շարունակվելու է մինչև վերջ, որովհետևս ես ինքս այդպես եմ մտածում, ինքս գտնում եմ, որ Երևանը շատ և շատ ավելի կանաչ պետք է լինի, քան այսօր է»,-ասաց նա՝ հավելելով, թե 2018-ի հոկտեմբերի 15-ից շատ մեծ քայլեր են արվել այդ ուղղությամբ:

Մանրամասները՝ Tert.am-ի տեսանյութում: