Թուրք-ադրբեջանական զորավարժությունների ռազմական բնույթը ստորադասված է, դրանք ընդգծված քաղաքական են․ Ռուբեն Մելքոնյան. Տեսանյութ

Թուրք-ադրբեջանական զորավարժությունները մեծ պլանի մաս են և ուժի ցուցադրում։ Վստահաբար կարող եմ ասել՝ այս զորավարժություններ ընդգծված քաղաքական են և դրանց ռազմական բնույթը ստորադասված է։ Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է թուրքագետ Ռուբեն Մելքոնյանը։

Թուրքագետի խոսքով՝ Հայաստանի նկատմամբ ադրբեջանական դիվերսիոն գործողությունն ընդամենը պատրվակ էր․ «Թուրքական ակտիվացման ու նրա նկրտումների իրականացման համար դիվերսիոն վերջին ներթափանցման փորձը պատրվակ էր, որպեսզի իրականցնեն թուրքական մեծ ծրագիրը, որի հիմքում ընկած է ազգային ուխտի քարտեզը»։

Հաղորդման մյուս հյուրը՝ «Դեմոկրատական» կուսակցության ղեկավար Արամ Սարգսյանը նշում է, որ Թուրքիայի ախորժակը տարածաշրջանում օր օրի բարձրանում է․ «Էրդողանը փորձում է պանթուրանիզմի գաղափարախոսությունը համադրել նեոօսմանիզմի հետ: Ու մենք այսօր տեսնում ենք, որ Նախիջևանի ուղղությունն անվտանգության խնդիր ունի»։

Հարցին՝ ի՞նչ պետք է արվեր, որ չի արվել, Արամ Սարգսյանը պատասխանել է․ «Երբ Թուրքիան Նախիջևանում դիրքավորվում էր, մենք թնդանոթներ առաջ չքաշեցինք, որովհետև խաղաղասեր ենք, բայց մենք պետք է մտնեինք այն պետությունների շարքը, որոնք մեզ դաշնակից են այս կամ այն հարցի հետ կապված»։

Ըստ Արամ Սարգսյանի՝ այսօր ՌԴ նախագահ Պուտինը բացարձակ չի հարաբերվում ՀՀ վարչապետի հետ․ «Պուտինն Անվտանգության խորհրդի նիստում ցույց է տալիս, որ ինքը շատ շահագրգիռ է, որ տարածաշրջանում ամեն ինչ խաղաղ լինի, բայց մենք չենք տեսնում, որ երկու երկրների ղեկավարները խոսեն այս մասին։ Սա ցույց է տալիս, որ մենք այս հարցում ուղղակի թերացած ենք»։

Շարունակելով Արամ Սարգսյանի խոսքը՝ Ռուբեն Մելքոնյանը նշել է․ «Մինչև թուրքական զորքի՝ Նախիջևան մտնելը, Թուրքիայում տեղի է ունեցել Անվտանգության խորհրդի նիստ օրակարգային երեք հարցով՝ Մերձավոր Արևելք, Հունաստան և Հայաստան, ու այդ նիստի հայտարարությունն ուղենշում է Թուրքիայի հետագա քայլերը»։

Թուրքագետն ընդգծում է, որ այդ նիստից հետո Թուրքիան հստակեցրեց, որ ցանկացած հարցով կանգնած է Ադրբեջանի կողքին․ «Թուրքիան հստակ թիրախավորել է Հայաստանը ու սրանք անտեսել չի կարելի»։