Խախտումներ տեղամասերում (թարմացվում է, տեսանյութ)

 9/57 ընտրատեղամասում Հակոբ Բեգլարյանի կողմնակիցները շարունակում են անօրինական գործողությունները:

Քիչ առաջ NewsBook-ի թղթակիցն ականատես է եղել, թե ինչպես են ընտրատեղամասից քիչ հեռու տեղակայված Բեգլարյանի շտաբի անդամները մոտենում ընտրատեղմասին և ընտրակաշառք բաժանում:

Երբ լրագրողը սկսել է նկարել, շտաբին հարող տարածքում ընտրակաշառք ստացող կանայք փախչել են, այնուհետ քարեր նետել մեր լրագրողի ուղղությամբ: Եվ այդ պահին, երբ լրագրողը փորձել է պաշտպանվել, անջատվել է տեսախցիկը և չի հասցրել արձանագրել տեղի ունեցածը:

«Էս Նորագյուղն ա, մենք քեզ նիզակով էլ կխփենք»,- սպառնացել են NewsBook-ի լրագրողին:

Նշենք, որ ավելի վաղ մեր տեսախցիկը ֆիքսել էր, թե ինչպես են Բեգլարյանի կողմնակիցները գրիչներ բաժանում քվեարկողներին:

***

Քիչ առաջ Կոնդ թաղամասի Ռուսթավելու 15 հասցեում մի շարք քաղաքացիներ հարձակվեցին Araratnews.am-ի լրագրողի եւ օպերատորի վրա:

Երբ պատգամավորի թեկնածու Հակոբ Բեգլարյանի շտաբի մոտ մեր լրագրողը նկատել է կուտակումներ, փորձել է հասկանալ՝ ինչու են քաղաքացիները հերթով մտնում Բեգլարյանի շտաբ եւ դուրս գալիս, սակայն բնակիչները հարձակվել են լրագրողի եւ օպերատորի վրա, վիրավորել եւ խոչընդոտել նրանց:

Araratnews.am-ի լրագրողի ձեռքից խլել են նաեւ տեսանկարահանող սարքը, քաշել մազերից: Նշենք, որ «Ազատություն» ռադիոկայանի մեր գործընկերոջ հաջողվել է շտաբի ներսում տեսանկարահանել, թե ինչպես են քաղաքացիներին գումար բաժանում` հայտարարելով, թե դա աշխատավարձ է :

***

Ընտրատեղամասերում առավոտից արդեն կուտակումներ են: Տարօրինակն այստեղ այն է, որ եթե որոշ տեղամասերում գերբեռնված կուտակումներ են, ապա որոշներում ընդհանրապես քվեարկող չկա: 

Zham.am-ի թղթակիցը եղել է մի քանի տեղամասերում և արձանագրել իրավիճակը՝ տեղում:

Ըստ մեր թղթակցի, Դավթաշեն գյուղի 5/3 տեղամասում եղել են 50-ից ավելի մարդկանց կուտակումներ, որոնց զգալի հատվածը խոսել է ակնհայտ ոչ երևանյան բարբառով: Մինչդեռ, ընտրատեղամասին հարակից  5/2 և 5/1 ընտրատարածքներում ոչ մի քաղաքացի չի եղել: 

Լուսանկարներն արված են 5/3 ընտրատեղամասում:

***

168.am-ը գրում է. Այսօր համացանցում զետեղված հրապարակումներից մեկի համաձայն՝ Դավիթաշենի 5/17 ընտրատեղամասում միջադեպ է եղել. կոտրել են քաղաքացու հեռախոսը:

Տուժողը դիմել է ոստիկանություն և հայտնել, որ իրեն անհայտ անձը իր հեռախոսը կոտրել է: Հաղորդումն ընդունվել է: Հանգամանքները պարզվում են: Փաստի առթիվ ոստիկանության Դավիթաշենի բաժանմունքում նյութեր են նախապատրաստվում:

Կոնդում այսօր հարձակման է ենթարկվել «Ազատության» թղթակից Սիսակ Գաբրիելյանը:

Ամեն ինչ սկսվել է այն բանից հետո, երբ մեր թղթակիցը նկատել է, որ ընտրողները, նախքան տեղամաս գնալը, մտնում են Հանրապետականի պատգամավորության թեկնածու Հակոբ Բեգլարյանի շտաբ: Դուրս գալուց նրանցից մի քանիսի ձեռքին մեր թղթակիցը գումար է նկատել, որից հետո նույնպես մտել է շտաբ:

Տեղում գտնվող անձինք, նկատելով լրագրողին, պարզաբանել են, թե ոչ թե ընտրակաշառք են բաժանում, այլ աշխատավարձ: Այդ ժամանակ շտաբում գտնվող մի խումբ անձինք, այդ թվում՝ երիտասարդներ, հարձակվել են լրագրողի վրա, խլել հեռախոսը, սկսվել է քաշքշուկ և մեր թղթակիցը աչքի հատվածում թեթև վնասվածք է ստացել:

***

«Օհանյան-Րաֆֆի-Օսկանյան» դաշինքի տեղեկատվական կենտրոնի շտապ հաղորդագրությունը 12:30 դրությամբ արձանագրված խախտումների վերաբերյալ:

Խախտումների ցուցակին կարող եք ծանոթանալ՝ այստեղ:

Zham.am