Իշխանական էլիտայի անզուսպ հաճույքներն ուղղակի վիրավորանք են Տավուշում զոհված մեր տղաների հասցեին. պատգամավոր Հայկ Սարգսյանը պետք է վայր դնի մանդատը

Փաշինյանի մերձավոր շրջապատի անդամ պատգամավոր Հայկ Սարգսյանը պետք է վայր դնի մանդատը։ Խնդիրը ոչ այնքան հակահամաճարակային պայմանների խախտումն է, պարետատան ու անձամբ Փաշինյանի հորդորների և կոչերի անտեսումը։ Սա իհարկե, կարևոր է, բայց կա ավելի էական պահ, այս մասին ասվում է Այլընտրանքային նախագծեր խմբի անդամ Մարինե Սուքիասյանի մեկնաբանությունում, որում վերջինս անդրադառնում է օրերս Սևանի White Shorja լողափում Գոռ Սուջյանի համերգին և դրան հետևած «փարթիին», որին մասնակցել է նաև պատգամավոր Հայկ Սարգսյանը:

«Հայաստանը դեռ ապրում է Տավուշի ռազմական գործողությունների ազդեցության, ռիսկերի փուլում։ Մենք ունենք զոհեր, որոնց յոթը, քառասունքը չի անցել, մենք ունենք վիրավորներ, որոնց մասին արդեն փորձում ենք մոռանալ, և եթե նկատել եք նրանց առողջական վիճակի մասին լրահոսը գնալով դառնում է կցկտուր»,- նշում է նա։

Ըստ Մարինե Սուքիասյանի՝  այս պայմաններում իշխանական էլիտայի անզուսպ հաճույքներն «ուղղակի վիրավորանք են մեր տղաների հասցեին»։ «Ստացվում է, որ կռիվը կռիվ, հետո մի քանի օր անց սկսու՞մ ենք մեր քեֆերը։ Եթե դա արվեր հասարակ քաղաքացիների կողմից, ապա կարելի էր լինել ներողամիտ և վերագրել անհատական դաստիարակության խնդիրներին։ Բայց այստեղ խոսքը գնում է իշխանական նեղ էլիտայի ներկայացուցչի մասին և սա արժեհամակարգային խնդիր է։

Կա՛մ Փաշինյանը Հայկ Սարգսյանի հետ է իր իրական արժեքներով, կա՛մ Փաշինյանը ցույց է տալիս, որ իր համար նույնպես մերժելի են ռազմական գործողություններից ու հերոսական զոհերից հետո նման անպարկեշտ քեֆերը»,- նշում է նա։