Իմ ամբողջական անվստահությունն եմ հայտնում այս կառավարությանն ու վարչապետին․ Լարիսա Ալավերդյան. Տեսանյութ

Ճիշտ ժամանակն է, որ իմ ամբողջական անվստահությունը հայտնեմ այս կառավարությանը եւ վարչապետին, հենց այն հարցերից ելնելով, որոնք վերաբերում են հայության անվտանգությանը, այսինքն՝ ե՛ւ ՀՀ, եւ ԱՀ եւ Սփյուռքի հայության։ Այս մասին NEWS.am-ի հետ զրույցում հայտարարել է, Արցախի հարցերով փորձագետ,  «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը, ի պատասխան կառավարության վերջին նիստում վարչապետ Նիկոլ Փաշինյանի ներկայացրած  կետերը մեկնաբանելու խնդրանքին։

«Այս երկու տարի եւ 2,5 ամսվա ընթացքում ես լսել եմ ամենատարբեր կետեր, ամենատարբեր, այսպես կոչված, սկզբունքներ, որոնք, կներեք, արժեք չունեն։ Եվ չքննարկելով նրա այդ կետերը, ես անվստահություն եմ հայտնում վարչապետին։ Եվ թե որ կետերն էին կրկնում նախկին իշխանությունների ասածները, ես մերժում եմ այդ համեմատությունները։ Եթե դա իշխանափոխություն էր նախկինի հետ համեմատվելու համար, ես մերժում եմ այն, եթե հեղափոխություն էր՝ մերժում եմ այդ հեղափոխությունը։ Մեր ակնկալիքները ոչ թե հին իշխանության հետ համեմատություններն էին, այլ մեր ապագայի, մեր տեսլականի հետ համեմատությունները։ Կան այնպիսի վիրավորական համեմատություններ, նույն այդ Տավուշի դեպքերի օրերին․․․ Ուզում եմ ցավակցել մեր նվիրյալների ընտանիքներին, ինձ համար ամեն մի կորուստ հավասարազոր է հարազատ մարդուն կորցնելուն․․․ Եվ այդ օրերին համեմատություններ էին անում Ապրիլյան պատերազմի հետ, իսկ դա նշանակում է, որ ոչ Ապրիլյանի գինը գիտեն, ոչ Տավուշում տեղի ունեցածի, ոչ էլ հասկանում են Չինարիում կամ Այգեպարում ապրող մարդկանց։ Եվ այդ ֆոնին խաղաղության կոչերը ձեռառնելիք էին այն մարդկանց հանդեպ, որոնք իրենց կյանքով, այնտեղ ապրելով այդ թնդանոթների կրակոցների ձայնի ներքո, պայքարում են այդ նույն խաղաղության համար, ինչպես եւ արցախահայությունը։ Այդ կեղծ կոչերին հակառակ իրենք կյանքով են ու այնտեղ մնալով են պայքարում այդ խաղաղության համար։ Եվ այդ 7 կետերը, ոչ էլ նախկին 5 կետերը ինձ չեն հետաքրքրում։ Կսպասենք կտեսնենք հետագայում, արդյո՞ք իրենց խոսքում, ռազմավարությունում կամ մարտավարությունում փոփոխություն կմտցնեն, արդյո՞ք կհրաժարվեն այդ կրավորական բառապաշարից, մտապաշարից ու քաղաքականությունից, որը մինչեւ հիմա վարում են։ Այս անորոշությունը, որի մեջ հայությանը պահում են այս իշխանությունները, ավելի վտանգավոր է, քան այն որոշակիությունը, որ ներկայացնում էր առաջին նախագահը, ամբողջական սխալ, բայց նա պարզ արտահայտել է այն եւ ժողովուրդը մերժել է», ասել է Լարիսա Ալավերդյանը։

Արցախի փորձագետի խոսքով՝ հիմա մենք նորից լսում ենք Արցախի ինքնորոշման իրավունքի ճանաչում, մինչդեռ ոչ մի բառ չի ասվում Արցախի տարածքային ամբողջականության անձեռմխելիության կամ սահմանների անքակտելիության մասին։

«Արցախը Ադրբեջանից ինքնորոշման իրավունքի ճանաչում չի մուրում։ Ադրբեջանը ոչ մի իրավունք չունի ճանաչել կամ ճչանաչել Արցախը։ Իշխանության բառապաշարից դուրս է մղվել Արցախի անկախություն եզրույթը, հիմա սպեկուլյատիվ ու ցածրակարգ մանիպուլյատիվ հայտարարություններ են անում Հայաստանին միացնելու մասին։   Ո՞վ չգիտի, որ ի սկզբանե Միացում շարժումն է եղել, հետո է Արցախը հրաժարվել դրանից, ո՞վ չգիտի, որ առաջին նախագահը համաձայն էր, որ Արցախը մնա Ադրբեջանի կազմում բարձր կարգավիճակով։ Իսկ այսօրվա անորոշության մեջ ես չգիտեմ ինչ նպատակներ ունի իշխանությունը։ Ես չեմ վստահի, որ այսօրվա իշխանությունը արտահայտի Արցախի դիրքորոշումը։ Այն տոկունությունը, որ հանդես են բերել Արցախի իշխանությունները բոլոր այս տարիներին, ես համոզմունք չունեմ, որ այստեղ ունեն», նշել է Լ․Ալավերդյանը։

«Իսկ իշխանությունն այս օրերին չապացուցե՞ց, որ կարող է կազմակերպել երկրի պաշտպանության գործը» հարցին ի պատասխան, Լարիսա Ալավերդյանն ասել է, որ իշխանությունը հեղհեղուկ արտահայտություն է․

«Խոսքը Բանակի վստահության մասին է։ Լինի Հայաստանի, թե Արցախի սահմանները պաշտպանելը, որեւէ մեկը կասկած չունի, եւ այս առումով էլի շրջանառության մեջ են շպրտում «նրանք, ովքեր չեն վստահում իշխանություններին, բայց ձոնում են Բանակը, ուզում են սեպ խրել իշխանության ու Բանակի միջեւ» արտահայտությունը,  այդ իշխանությունն է սեպ խրում բոլոր այն կետերում, որտեղ ինքը պետք է միաբանության կոչերով ու գործողություններով հանդես գա։ Իշխանության առաքելությունն ընդհանրապես մեկ բանում է՝ հաստատել քաղաքացիական համերաշխություն, մնացյալը մարդիկ անում են։ Ազգը, հասարակությունը բաղկացած է տարբեր շերտերից, իշխանության գլխավորագույն անելիքը նրանց համախմբելն է, համերաշխություն հաստատելը։ Իսկ այն, ինչ տեսնում եմ, ապացուցում է հակառակը։ Չեմ ասում մյուս ոլորտները, այդ թվում կրթության։ Վերջին կաթիլը եղավ ԿԳՄՍ նախարարության չափորոշիչները։ Ում են ձեռք առնում Հայ գրականությունից հայ բառը հանելով։ Ես սպասել եմ բավականին երկար, եւ հիմա հայտնում եմ իմ անվստահությունն այս իշխանությանը», ընդգծել է Լարիսա Ալավերդյանը։