Պատրաստ եմ ապացույցներ տրամադրել իշխանություններին` ռուսական կողմին փոխանցելու նպատակով. Սուրեն Սարգսյանը Ադրբեջանի կողմից ֆինանսավորված՝ ԱՄՆ-ի Կոնգրեսի ընդունած հակահայկական և հակառուսական բանաձևի մասին. Լուսանկար

Երևանը չպետք է թույլ տա ԱՄՆ Կոնգրեսին ընդունել «հակահայկական» բանաձևը (որը ներառվել 2021թ Ազգային պաշտպանության հաստատման վերաբերյալ օրենքում - խմբ.), հարկ է համապատասխան քայլեր ձեռնարկել ինչպես արտգործնախարարության շրջանակներում, այնպես էլ խորհրդարանական դիվանագիտության: Այս մասին ասաց քաղաքագետ Սուրեն Սարգսյանը «Sputnik Армения»-ի հետ զրույցում:

Ավելի վաղ ԱՄՆ Կոնգրեսի Ներկայացուցիչների պալատի իրավական հարցերով հանձնաժողովը օրակարգ է մտցրել կոնգրեսականներ Սթիվ Շաբոթի և Ստեֆանի Քոենի լրացումը: Լրացման մեջ խոսքը գնում է «Ուկրաինայում, Վրաստանում, Մոլդովայում և Ադրբեջանում ներքին տեղահանվածների կարգավիճակի վերաբերյալ»: Մինչդեռ դրանում չեն հիշատակվում հայ փախստականները, որոնք լքել են Ադրբեջանը Սումգայիթի և Բաքվի ջարդերից հետո:

Բանաձևի մեջ, խոսքը գնում է փախստականների իրավունքների մասին, ինչպես նաեւ այսպես կոչված,  «գրավյալ տարածքներում» Ուկրաինայի, Վրաստանի, Ադրբեջանի և Մոլդովայի իրավունքներին է վերաբերում: Բացի այդ, բանաձևում նշվում է այն պահանջը, որ ԱՄՆ պետքարտուղարը, պաշտպանության նախարարը, պետք է պարբերաբար զեկույց ներկայացնի Կոնգրեսի համապատասխան հանձնաժողովներին:

Իրենց զեկույցներում պաշտոնյաները, պետք է նշեն 1991 թվականից ի վեր այդ «գրավյալ տարածքներից» վտարված և սպանված մարդկանց թիվը:

«Սա ԱՄՆ պատմության մեջ ամենահակահայկական բանաձևն է: Այն աննախադեպ է նրանով, որ Կոնգրեսում նման հակահայկական ձևակերպումներով բանաձև չէր քննարկվել», - ասաց Սարգսյանը:

Նա հավելեց նաև, եթե այդ բանաձևը ընդունվի նաև ԱՄՆ Սենատում, այն լուրջ նախադեպ կդառնա ինչպես քաղաքական, այնպես էլ իրավական առումով: Հետագայում այն կարող է կիրառվել ինչպես ԱՄՆ-ի իրավական ակտերում, այնպես էլ միջազգային կառույցների: Ըստ Սարգսյանի, սրա հետևում կանգնած է Ադրբեջանը, որը բավականին մեծ ֆինանսական միջոցներ է ծախսել նման օրինագծի ֆինանսավորման ու օրակարգ բերելու համար:

Քաղաքագետը նաև հավելեց, որ Երևանը պետք է մեծ աշխատանք տանի, որպեսզի բանաձևը հոկտեմբեր ամսին չընդունվի: 

Այսօր՝ հուլիսի 22-ին, Սուրեն Սարգսյանը ֆեյսբուքյան իր էջում հայտնել է նաև, որ ունի փաստացի ապացույց, որ Ադրբեջանը ֆինանսավորել է այդ ոչ միայն հակահայկական, այլև հակառուսական բանաձևի ընդունումը:

«Կարծում եմ բոլորի համար ակնհայտ է, որ Կոնգրեսի ներկայացուցիչների պալատի երեկվա բանաձևը ոչ միայն հակահայկական, այլև հակառուսական է:

Ունեմ բավարար հիմքեր (պայմանագրեր, նամակագրության և այլն) ապացուցելու, որ Ադրբեջանը ֆինանսավորել է այս բանաձևի ընդունումը` մեր միջոցով նաև Ռուսաստանին խփելու համար: Պատրաստ եմ դրանք տրամադրել իշխանություններին` ռուսական կողմին փոխանցելու նպատակով:

ԱՄՆ-ում Ադրբեջանն աշխատում է նաև Ռուսաստանի դեմ և այս փաստին պետք է արձագանքի նաև Ռուսաստանը:

Կից հրապարակում եմ հասանելի պայմանագրերից մեկը», - գրել է նա:

Հիշեցնենք նաև, որ ԱՄՆ Կոնգրեսի Ներկայացուցիչների պալատը հավանության է արժանացրել երկրի 740,5 միլիարդ դոլարանոց ռազմական բյուջեի նախագիծը, որը նախագահի աշխատակազմին պարտավորեցնում է խստացնել պատժամիջոցները «Հյուսիսային հոսք-2» և «Թուրքական հոսք» գաղամուղների նկատմամբ:

Zham.am