Ֆիկտիվ լեգիտիմություն

Սերժ Սարգսյանը ջանք, եռանդ և գումար չի խնայում, շինծու սոցիոլոգիական հարցումներով ապագա կեղծիքները և ընտրությունների արդյունքները լեգիտիմացնելու համար։ Այս վերջին երկու ընտրությունների ընթացքում հրաժարվեց վարկաբեկված Ադիբեկյանից և դեմ տվեց մեզ «Գելափին»։ Սակայն կապ չունի, թե ով է սուտն արտահայտում, այն միևնույն է սուտ է մնում։ Վերջին վարձու սոցիոլոգիական հարցումն էլ ցույց է տվել, թե Սերժ Սարգսյանի վարկանիշը կազմում է 39 տոկոս։ Բոլորին պարզ է, որ Սերժ Սարգսյանը անգամ սեփական կուսակցությունում 39 տոկոս վարկանիշ չունի։
Երկրի ներսում նա փորձեց ստեղծել ֆիկտիվ լեգիտիմություն։ Այդ նույն պատրանքը նա փորձում է հրամցնել նաև եվրոպացիներին։ Եվրոպայում էլ փորձեց ներկայացնել, թե ինքը ազատ արդար ընտրությունների կողմնակից է և հնարավոր ամենինչ կանի «անթերի» ընտրությունների համար։

Այսօր էլ ռուսական ալիքներից մեկը լրատվական ծրագրի ժամանակ գովազդային նյութով հանդես եկավ, որով գովերգում էր Սերժ Սարգսյանի կուսակցությունը, նրան անվանելով ընտրությունների «ֆավորիտ»։ Հետաքրքրականն այն է, որ ռուսական ալիքը ռեպորտաժում հենվում էր Սերժ Սարգսյանի «Գելափի» հարցման վրա։
Հետաքրքրականն էլ այն է, որ ինչպես երկրի ներսում է Սերժ Սարգսյանը փորձում գովերգել նաև իր «գրպանային ընդդիմությանը», այնպես էլ արտերկրյա լրատվամիջոցներով է դրանց առաջ տանում։ Պատահական չէ, որ ռուսական ալիքը երրորդ տեղը տալիս է «Ելք» դաշինքին։

Խորհրդարանական ընտրություններին մնացել է մի քանի ժամ և մենք ունենք պատմական հնարավորություն՝ փոխելու մեր ապագան, ունենալու իրական ազատ ընտրություններ։ Դրա համար հասարակությանը կամք է հարկավոր, դիմակայելու ճնշումներին ու կատարելու ճիշտ ընտրություն։

Սամվել Ստեփանյան