Արա Աբրահամյանը Մոսկվայի «Ֆուդ Սիթի»-ում հայաստանյան վաճառողների իրավունքների ոտնահարման հարցը բարձրացրել է ՌԴ նախագահի աշխատակազմում

Մոսկվայի մեծածախ շուկաներից մեկում՝ գյուղատնտեսական «Ֆուդ Սիթի» շուկայում հայ առևտրականները խնդրի առաջ են կանգնել: Բանն այն է, որ երեկ դուրս են բերվել հայկական ապրանքներով բեռնատարներ, տաղավարների տերերին զգուշացվել է հանել «Հայաստան», «Հայկական», «Երևան», «Իջևան» և այլ բառերը` խուսափելու միջազգային խնդիրներից: Նշվում է, որ «Ֆուդ Սիթի» մասնավոր կառույց է, որի սեփականատերերից 2-ը Ադրբեջանի հրեաներ են:

Ռուսաստանի հայերի միության նախագահ Արա Աբրահամյանը հուլիսի 17֊ին բանակցություններ է վարել Ռուսաստանի իշխանությունների ներկայացուցիչների, այդ թվում՝ Ռուսաստանի Դաշնության նախագահի աշխատակազմի հետ՝ «Ֆուդ Սիթիում» տիրող իրավիճակի մասին։ Այս մասին Արա Աբրահամյանը հայտնել է ինստագրամյան իր էջում․ «Մենք նրանց տեղեկացրինք հայաստանյան վաճառողների իրավունքների ոտնահարման հետևանքով առաջացած ծանր իրավիճակի մասին և խնդրեցինք նրանց հնարավորինս շուտ միջոցներ ձեռնարկել առևտրականների օրինական իրավունքները վերականգնելու համար»,-գրել է Արա Աբրահամյանը: Ըստ Էթնիկական հարցերի դաշնային գործակալության ղեկավար Ի.Բարինովի՝ «Ֆուդ Սիթիի» ղեկավարները հավաստիացրել են, որ բոլոր վարձակալները, ներառյալ հայերը, նույնքան արժեքավոր են իրենց համար: Բարինովի խոսքով՝ իրենք «կանեն հնարավոր ամեն ինչ իրավիճակը կարգավորելու համար»:

Աղբյուրը՝ vesti.am