ՌԴ-ի զորավարժություններին 102-րդ ռազմաբազայի հետ ՀՀ ԶՈՒ–ից կներգրավվեն մեծ ուժեր. Արծրուն Հովհաննիսյան. Տեսանյութ

ՀՀ զինված ուժերը ռուսական զինված ուժերի, մասնավորապես, 102-րդ ռազմաբազայի հետ, ընթացիկ զորավարժությունների ընթացքում ունեն համատեղ միջոցառումներ, ինչպես ՀՀ տարածքում, այնպես էլ այլ զորավարժարաններում։ Այս մասին այսօր՝ հուլիսի 17-ին, ասուլիսի ժամանակ ասաց Վազգեն Սարգսյանի անվան ռազմական համալսարանի պետի տեղակալ, ռազմական փորձագետ, Տավուշում ստեղծված լրատվական ճգնաժամային կենտրոնի պատասխանատու Արծրուն Հովհաննիսյանը՝ անդրադառնալով այս ընթացքում ՌԴ-ի հարավային եւ արեւմտյան ռազմական շրջանների անակնկալ զորավարժությունների իրականացմանը։

«Ռուսաստանը մեծ պետություն է՝ հզոր բանակով եւ հաճախ կարող է իրականացնել նման գործողություններ. չեմ կարող մեկնաբանել դրանց  քաղաքական իրադարձությունների կապը։ 102-րդ ռազմաբազայի հետ այս մեծ զորավարժությունների ընթացքում ՀՀ զինված ուժերից կներգրավվեն բավականին մեծ ուժեր, մոտավորապես մեկ գնդին հավասար ուժեր՝ տանկային, հրետանային, մոտոհրաձգային  եւ այլն»։

Լրագրողը հիշեցրեց նաեւ հայ-ռուսական համատեղ զորախմբի մասին եւ հարցին՝ ՀՀ-ի սահմանների վտանգի դեպքում այդ զորախումբը ինչպիսի՞ գործառույթ է կատարելու, Հովհաննիսյանը պատասխանեց. «Հայ-ռուսական համատեղ զորախումբն ունի իր գործողությունների համապատասխան պլանը, ուղղությունը։ ՀՀ զինված ուժերը տվյալ դեպքում ընթացող մարտական գործողությունների ծավալի, բնույթի համար լիովին բավարար են եւ կարող են կատարել իրենց խնդիրները. չկա նման անհրաժեշտություն»։

Անդրադառնալով Թուրքիայի՝ Ադրբեջանին ռազմատեխնիկական աջակցություն տրամադրելուն՝ Արծրուն Հովհաննիսյանն ասաց, որ դա նորություն չէ։

Մանրամասները՝ տեսանյութում:

Zham.am