Վրաստանում կտուգանեն և կազատազրկեն «սխալ» քարտեզների համար. Ադրբեջանի հետ կոնֆլիկտը շարունակվում է. Լուսանկարներ

Վրաստանում կսկսեն տուգանել և կալանավորել «սխալ» աշխարհագրական քարտեզների պատրաստման և կիրառման համար: Հաղորդում է «Русская Весна» լրատվական գործակալությունը: 

Հուլիսի 2-ին Վրաստանի ՔՕ-ում ուժի մեջ մտած փոփոխության համաձայն, քաղաքացիները կտուգանվեն կամ կզրկվեն ազատությունից մինչ երկու տարի ժամկետով Վրաստանի քարտեզների արտադրության, գովազդի և օգտագործման համար, որոնց վրա կբացակայի նշված ռեգիոններից որևէ մեկը՝ Աբխազիա, Աջարիա, Հարավային Օսիա, ինչպես նաև Դավիթ Գարեջայի վանական համալիրը:

«Սխալ» քարտեզն արգելվում է նաև դուրս բերել երկրից, ինչպես նաև պատկերել այլ իրերի վրա:

Նշվում է, որ պատժից կարելի է խուսափել, եթե «սխալ» քարտեզն ինքնակամ հանձնվի մինչ քննության մեկնարկը:

Դավիթ Գարեջայի վանական համալիրը 6-րդ դարի քարանձավային վրացական վանքերի համալիր է, որը գտնվում է Թբիլիսիից 60 կմ դեպի հարավ-արևելք հեռավորության վրա, վրաց-ադրբեջանական սահմանին։ Վրաստանի և Ադրբեջանի միջև պետական սահմանը բաժանում է վանական համալիրը երկու մասի։ Ադրբեջանը պարբերաբար արգելափակում է քրիստոնյա ուխտավորների մուտքը սրբավայր:

2007թ.-ից ի վեր վրաց-ադրբեջանական հարաբերություններում գորդյան հանգույցի վերածված միջնադարյան վանական համալիրի՝ Դավիթ Գարեջայի պատկանելության խնդիրը կրկին օրակարգում հայտնվեց 2019թ. գարնանը՝ առժամանակ ստվերելով վրաց-ադրբեջանական «եղբայրական և դաշնակցային» հարաբերությունները:

Վանական համալիրը Աբխազիայի և Հարավային Օսիայի հավասարեցման որոշումը ցույց է տալիս պաշտոնական Թբիլիսիի լուրջ մտադրությունները այս պատմական վայրի վերաբերյալ: Այս փաստը կարելի է ընկալել որպես լարվածության ևս մեկ փուլ վրաց-ադրբեջանական հարաբերությունների մեջ այս համալիրի հետ կապված:

Zham.am