Գյուղերը դատարկվում են. գործ ունենք պետության կորստի հետ. Տիգրան Եղոյան. Տեսանյութ

Բանակից ծլկած քաղքենիներն այսօր գյուղատնտեսության ու պետությանը հերն են անիծում: Գործ ունենք պետականության կորստի հետ: Որպես ՀՀ քաղաքացի՝ տեսնում եմ դատարկվող գյուղերը, որոնք արվում է միտումնավոր՝ դրսի ուժերի հրահանգով:

Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է ֆերմեր Տիգրան Եղոյանը:

Ֆերմերի խոսքով՝ վարչապետի գլխավորությամբ այսօրվա իշխանությունը քանդում է գյուղատնտեսության ոլորտը. «Վարչապետը հեծանիվով եկավ գյուղ, ասաց՝ գյուղացուն վարկեր ենք տրամադրում: Պաշտոնապես իմ ու բազում ֆերմերների անունից ասում եմ՝ դա սուտ է, բլեֆ»:

Տիգրան Եղոյանն ահազանգում է մի քանի հարցերի մասին. «Գետերը ցամաքել են, խոտի խնդիր ունենք: Գյուղատնտեսությունը մեռած վիճակում է»:

Հաղոդրման մյուս հյուրի՝ «Ագրագյուղացիական միավորում» ՀԿ ղեկավար Հրաչ Բերբերյանի դիտարկմամբ էլ այսօր գյուղացիներն իսկապես խնդիր ունեն. «Կառավարության ամենամեծ սխալը Գյուղատնտեսության նախարարությունը փակելն էր: Հարյուր անգամ բացատրեցինք վարչապետին ու փոխվարչապետին՝ ոլորտը համակարգել է պետք»:

Ըստ Հրաչ Բերբերյանի՝ այսօր Կառավարությունում գյուղատնտեսությունից հասակցող ոչ ոք չկա. «Երկու դեղնակտուցի նստացրել են այնտեղ, ովքեր չեն էլ հասկանում գյուղատնտեսությունից»:

Հրաչ Բերբերյանը հարց է ուղղում Նիկոլ Փաշինյանին․ «Պարոն վարչապետ՝ ինչու՞ են գյուղացու անվան տակ գումարներ ստանում բանկերը, այսինքն՝ սուբսիդավորումն ինչու՞ է գնում բանկերին»։

Հրաչ Բերբերյանը հիշում է, որ երկրորդ նախագահ Ռոբերտ Քոչարյանի օրոք գումարները փոխանցվել են անմիջապես գյուղացուն, որն էլ տվել է իր արդյունքը։

Անդրադառնալով սպանդանոցների հարցին՝ ֆերմեր Տիգրան Եղոյանը նշել է․ «Սպանդանոցների հետ կապված գյուղացին նորից բախվում է բանկերին, նորից գալիս է Կառավարության դուռը։ Ոչխարին բերում են սպանդանոց՝ անհանգիստ վիճակում, սա խայտառակություն է։ Խնդիր կա նաև սերմնացուների հարցում»։

Հրաչ Բերբերյանն էլ իր հերթին նշում է, որ վերջին երեք-չորս տարում Հայաստան որակյալ սերմնացու քիչ է ներկրվել․ «Այո՛, մշակվեց ծրագիր, որով 2000-3000 տոննա սերմնացու կմտնի երկիր, գոնե սա լավ է»։

Հրաչ Բերբերյանը զգուշացնում է վարչապետ Նիկոլ Փաշինյանին՝ առանց ոլորտի մասնագետների հնարավոր չէ ոլորտը զարգացնել։