Երբ չես կարողանում վերահսկել անգամ սեփական կուսակցությունդ

Վերջին ամիսներին իշխանական ԶԼՄ-ները պարբերաբար նյութեր էին հրապարակում այն մասին¸ թե իբր այս կամ այն գործչի քաղաքական հայտը կամ քաղաքականություն վերադառնալու ցանկությունը համաձայնեցված է Սերժ Սարգսյանի հետ և իբր հենց նա է որոշում¸ թե ինչ քաղաքական գործունեություն կարող են ծավալել քաղաքական գործընթացի մեջ ներգրավված անձինք: Նման հրապարակումների հիմնական նպատակը կայանում է նրանում¸ որ անհրաժեշտ է¸ պատրանք ստեղծել¸ թե իբր Սերժ Սարգսյանը վստահորեն վերահսկում է ոչ միայն ներիշխանական դաշտը¸ այլ նաև գծագրում է ոչ իշխանական բևեռում գործող անձանց պլանները:

Սակայն իրականությունը միանգամայն այլ պատկեր ունի. ՀՀ նախկին վարչապետ Հովիկ Աբրահամյանի դուրս գալը ՀՀԿ-ից այնքան անակնկալ է եղել իր նախկին կուսակիցների համար¸ որ անգամ ՀՀԿ գործադիր մարմնի անդամ Ռուբեն Թադևոսյանն «Ազատության» հետ զրույցում չի կարողացել թաքցնել իր զարմանքը և նշել¸ որ Աբրահամյանի որոշումը անակնկալ էր և դրդապատճառները դեռևս հայտնի չեն: 

Սակայն ինչպես երևում է՝ Հովիկ Աբրահամյանը վերջինը չի լինի¸ ով դուրս է գալու ՀՀԿ-ից: Ըստ մամուլի՝ հունվարի 25-ի հրապարակումների¸ մոտակա օրերին մի շարք ազդեցիկ հանրապետականներ ևս կլքեն դեռևս իշխող կուսակցության շարքերը:

Հետագա զարգացումները խոստանում են լինել շատ հետաքրքիր¸ սակայն արդեն հիմա իսկ կարող ենք փաստել¸ որ ՀՀԿ-ի ներսում տեղի է ունենում այն գործընթացը¸ որի մասին շատերը խոսում էին: Սերժ Սարգսյանի քաղաքականությունից դժգոհ է հանրության ոչ միայն ճնշող մեծամասնությունը¸ ընդդիմությունը¸ Սփյուռքը¸ այլ նաև լուրջ և ազդեցիկ շրջանակներ իշխանության ներսում: ԵՎ վաղ¸ թե ուշ այդ դժգոհությունը իրենց մարմնավորումը պետք է ստանային¸ իսկ ե՞րբ¸ եթե ոչ՝ նախընտրական շրջանում:

Արմեն Միքայելյան