Բոլոր քայլերն իրենց դեմ են դուրս գալու․այս երկրագնդի վրա ոչ ոք չի շահել, երբ պատերազմ է հայտարարել ԶԼՄ-ներին. Ա. Օհանյանը՝ ոստիկանության կողմից «Արմնյուզ» ՀԸ-ի դեմ վարչական վարույթ հարուցելու մասին
Եթերում դիմակ կրելը ինքնին աբսուրդի ժանրից է, միայն այն փաստը, որ ոստիկաններն այցելել են հենց «Արմնյուզ» հեռուստաընկերություն, արդեն ցույց է տալիս իշխանության մտադրությունների վեկտորը: Այս մասին Tert.am-ի հետ զրույցում ասաց «Հրապարակ» օրաթերթի գլխավոր խմբագիր Արմինե Օհանյանը՝ անդրադառնալով ոստիկանների կողմից ՀԸ այցելությանը և վարչական վարույթի հարուցմանը։
Նա նշեց՝ կարծես թե մյուս հեռուստաընկերություններն էլ դիմակ չեն կրում որոշ դեպքերում և ինքնին դիմակ կրելու պահանջն արդեն աբսուրդի ժանրից է: «Ես ինքս հեռուստատեսությամբ հաղորդում եմ վարում, մեկ հաղորդումը դիմակով վարեցի, ավելի ուշ ՀՌԱՀ նախագահ Տիգրան Հակոբյանի պարզաբանումից հետո, որ պարտադիր չէ, հրաժարվեցինք այդ սահմանափակումից. եթե դու պահում ես սոցիալական հեռավորությունը, դիմակ կրելը դառնում է բոլորովին անհեթեթ»,- ասաց նա:
Օհանյանը միևնույն ժամանակ ընդգծեց, որ սա նոր բան չէ, երբ իշխանությունը քայլեր է ձեռնարկում իր նկատմամբ քննադատությամբ հանդես եկող լրատվամիջոցների ուղղությամբ: «Մենք նաև արձանագրեցինք, որ մեկ ամիս առաջ գրույթուններ են ստացել որոշ լրատվամիջոցներ ՏՄՊՊՀ-ից, որն այդ գործողությունների նույն շարքից է: Այսինքն՝ քննադատող լրատվամիջոցներին վախեցնելու, սահմանափակումներ մտցնելու, նրանց գործողությունների մեջ ինչ-որ փոփոխություններ պարտադրելու համար»,- նշեց նա:
Արմինե Օհանյանն ասաց, որ այսօրվա միջադեպը շատ վրդովվեցնող է: «Ես ուղղակի չեմ պատկերացնում, թե ինչի են ուզում դրանով հասնել, ի վերջո լրատվամիջոցների, լրագրողների, հեռուստաընկերությունների բերանը փակել, սահմանափակել, զսպել հնարավոր չէ, որովհետև, ինչպես ասում են, Ջինը շշից դուրս է եկել արդեն: Այդ ազատությունը վայելող լրատվամիջոցները շատ մեծ դժվարությամբ են ազատվելու իրենց ազատությունից, մարտնչելու են,պայքարելու են իրենց ազատության ամեն մի սանտիմետրի, ամեն մի գրամի համար, այնպես որ, դրանք անիմաստ քայլեր են, որ ձեռնարկվում են իշխանությունների կողմից»,- շեշտեց նա:
Հարցին էլ՝ ծիծաղելի չէ՞, որ դիմակ կրելու պատրվակով պետք է խոսքի ազատությունը սահմանափակեն, դա այդքան էլ նպատակահարմար չէ և կարող էին այլ ճանապարհ ընտրել, նա ասաց. «Մի՛ անհանգատսացեք, իրենք այլ պատճառներ էլ կգտնեն, իրենք բոլոր պատճառները, պատրվակները կօգտագործեն և՛ ֆինանսական ճնշումների ենթարկելու, և՛ վախեցնելու, և՛ զգուշացնելու: Ի վերջո ոչ մի լրատվամիջոցի հաճելի չէ, երբ ոստիկանությունը այցելում է խմբագրություն, դա ինքնին հոգեբանորեն ճնշելու մեթոդ է լրագրողների, լրատվամիջոցի ղեկավարների նկատմամբ, բայց էլի եմ ասում՝ չի ստացվելու, չի հաջողվելու, այս բոլոր քայլերն իրենց դեմ են դուրս գալու, որովհետև այս երկրագնդի վրա ոչ ոք չի շահել, երբ պատերազմ է հայտարարել լրատվամիջոցներին»:
Հետևեք մեզ Facebook-ում