Դու նախ դիմիր հայ ժողովրդին, հետո Ադրբեջանի ժողովրդին․ Սերգեյ Շաքարյանցը՝ Նիկոլ Փաշինյանին. Տեսանյութ

Ադրբեջանի նախագահ Ալիևը հանդես է եկել քրեական հանցագործության մեջ կոնկրետ մեղադրանքներով, քանի որ մաքսանենգությունը քրեական հանցագործություն է, ոչ թե քաղաքական: Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է տարածաշրջանային հարցերով փորձագետ Սերգեյ Շաքարյանցը՝ անդրադառնալով Իլհամ Ալիևի վերջին հայտարարությանն ու մեղադրանքներին՝ ուղղված Հայաստանի իշխանություններին:

Ըստ Սերգեյ Շաքարյանցի՝ նման մեղադրանք նախկինում երբևէ չի եղել, քանի որ նախկին իշխանությունները մաքսանենգությամբ չեն զբաղվել. «Դուք հասկանում եք՝ օդային տրանսպորտի օգտագործումը մենաշնորհ չէ, բայց այն վերահսկվում է իշխանության կողմից: Այսինքն՝ ում պետք է եղել, տեղյակ են եղել մաքսանենգ ծխախոտի արտահանման մասին»:

Հարցին՝ ինչու՞ այս փուլում այսպիսի հայտարարություն արեց Իլհամ Ալիևը, Սերգեյ Շաքարյանցը պատասխանել է. «Գուցե Ալիևի ինչ-որ ակնկալիք չի արդարացել: Ես դժվարանում եմ ասել՝ վերելակում Փաշինյանն ու Ալիևը վերելակում ինչ են խոսել, բայց ինչ որ պայմանավորվածություն ժամկետներում չի կատարվել»: Ըստ քաղաքագետի՝ Հայաստանի պատասխանը Ադրբեջանին այնքան արժանի չէ, որքան որ ուզում են ներկայացնել մեր ժողովրդին։

Սերգեյ Շաքարյանցին հետաքրքրում է՝ ինչու՞ նախկիններին անդրադառնալիս Ալիևը չի անդրադարձել նաև ՀՀ առաջին նախագահ Լևոն Տեր-Պետրոսյանին. «Երևի Լևոն Տեր-Պետրոսյանը նրանց դեռ հույս է ներշնչում, ինչու՞ ոչ: Տեր-Պետրոսյանը թե՛ Հեյդար Ալիևի, թե՛ Իլհամ Ալիևի ընտանիքների հետ սերտ շփում է ունեցել»:

Դիտարկմանը, որ Ալիևի հայտարարությանը պատասխանել էր ՀՀ երկրորդ նախագահ Սերժ Սարգսյանը, ինչ-որ տեղ նաև մեղադրելով մեր իշխանություններին, և Նիկոլ Փաշինյանը չպատասխանեց Սերժ Սարգսյանին, քաղաքագետը նշել է․ «Ի՞նչ պետք է պատասխաներ Սերժ Սարգսյանին։ Նախկին իշխանություններից բացի փող պահանջելուց Նիկոլ Փաշինյանն ուրիշ ասելիք չունի նրանց»։

Սերգեյ Շաքարյանցը չի հասկանում Նիկոլ Փաշինյանի այն հայտարարությունը, որ նա պատրաստ է երկխոսել կամ էլ դիմել Ադրբեջանի ժողովրդին․ «Դու հլը դիմի հայ ժողովրդին, տես՝ պատրաստ է՞ ադրբեջանցիների հետ նույն տարածքում ապրել։ Այսօր մարդկանց վերաբերմունքը փոխվել է այս իշխանության նկատմամբ»։