Նրա անհեթեթ պնդումները ոչ մի բան դեպի դրականը չեն փոխում ոչ երկրում, ոչ էլ դրսում․Վահան Արծրունին՝ Արսեն Թորոսյանի մասին. Տեսանյութ
Եթե հիշում եք մարտի 1-ին ես պահանջեցի, որպեսզի Առողջապահության նախարար Արսեն Թորոսյանին պաշտոնանկ անեն, քանի որ նա ապակողմնորոշում է հանրությանը՝ կորոնավիրուսի վերաբերյալ իր հայտարարություններով:
Այս մասին Անժելա Թովմասյանի՝ Արմնյուզ ՀԸ «Հայելու առաջ» հեղինակային հաղորդման ժամանակ ասել է ԵՊԲՀ հոգաբարձուների խորհրդի նախագահ, երաժիշտ Վահան Արծրունին:
Վահան Արծրունու խոսքով՝ իր կանխատեսումը, որ Արսեն Թորոսյանն անունակ է կազմակերպել հակահամաճարակային գործընթացը Հայաստանում, վերջին մի քանի ամիսները ցույց տվեցին, որ ճիշտ էր. «Երբ նախարարը չգիտի՝ ինչ պետք է ասել վիրուսի պաթոգենական ծագման մասին, բնականաբար նա չի կարողանա նաև կողմնորոշել երկրի ղեկավարությանը՝ վիրուսի դեմ պայքարը ճիշտ կազմակերպելու հարցում»:
Ըստ Վահան Արծրունու՝ Հայաստանն ուշացավ իրականացնել համապատասխան քայլեր պանդեմիայի ժամանակ. «Եթե դու ուշացած ես սկսում կարանտինը, այն սովորաբան կտրուկ փոփոխության չի բերում, այսինքն՝ դուք չեք կարող կառավարել էպիդեմիայի ընթացքը»:
Հարցին՝ թեկուզ ներքին կարգով նախարարից որևէ արձագանք եղա՞վ այս մեղադրանքներին, Վահան Արծրունին պատասխանել է. «Պաշտոնական որևէ անդրադարձ չեղավ: Ես ֆեյսբուքյան իմ հարթակն օգտագործում եմ, որպես քաղաքացի՝ սեփական տեսակետներս արտահայտելու հարցում»:
Վահան Արծրունին հիշեցնում է նաև, որ ինքը նույն կերպ իր զարմանքը արտահայտեց, երբ վարչապետը հայտարարեց, որ կորոնավիրուսով վարակված 200 հոգի չեն կարողանում բուժօգնություն ստանալ, երկուսն էլ մահացել են. «Մարտ ամսից Բժշկական համալսարանին կից պատրաստ է բաժանմունք, որը պատրաստ է ընդունել կորոնավիրուսով վարակվածներին և, որը չի նկատում Առողջապահության նախարարը»:
Վահան Արծրունին հարց է բարձրացնում՝ ինչու՞ չի նկատում. «Պարզվեց, որ ոչ միայն պետական հիվանդանոցի հնարավորությունները չէին նկատվում, այլև՝ մասնավորինը: Ամիսներ առաջ մասնավոր հիվանդանոցներն առաջարկել էին իրենց անկողնային ու բժշկական ֆոնդն օգտագործել համավարակի պայմաններում»:
Հարցին՝ պատճառն ի՞նչ էր, որ նախարարությունը չէր արձագանքում այս առաջարկներին,գուցե՝ պետական միջոցներ չօգտագործելու համար, Վահան Արծրունին նշել է. «ԵՊԲՀ-ն սեփական միջոցներով պատրաստել էր մեկուսարան՝ չսպասելով, որ նախարարությունը բյուջե իջեցնի: Այնինչ՝ նախարարությունը համավարակի պայմաններում պետական բյուջեից գումար է ստանում»:
Վահան Արծրունու խոսքով՝ մարդու կյանքի համար պայքարում պետք է հաշվի առնել բոլոր միջոցներն. «Անհրաժեշտ է ոչ թե մարդկանց սորտավորել, այլ պայքարել յուրաքանչյուր կյանքի համար, սակայն նախարարը բարձրաձայնեց սորտավորման մասին՝ իբրև քաղաքականություն»:
Այսպիսով՝ սորտավորման քաղաքականությունը վերաբերվում էր ոչ միայն հիվանդներին, այլ նաև բուժհաստատություններին, որտեղ մարդիկ պետք է իրենց փրկությունն ունենային:
Հետևեք մեզ Facebook-ում