Եթե Արսեն Թորոսյանի կոչը Ալեն Սիմոնյանն է արհամարում, ինչո՞ւ պիտի այդ կոչին հետևեն հասարակ քաղաքացիները. Լուսանկար
Այս իշխանությունների իրական բնութագիրը դժվար է տալ: Դժվար է ասել սրանք ցինիկ ե՞ն թե սրանց աջ ձեռքը չգիտի, թե ինչ է անում ձախը:
Արսեն Թորոսյանը կոչով դիմում է քաղաքացիներին, «գիտակցված լոկդաունի» պահանջով, որում նշում է բառացիորեն հետևյալը. «...Բոլորս պետք է սահմանափակենք մեր ոչ կենսական շփումները, շարժումները, այցերը, միջոցառումները, հանդիպումները։
Պետք է մնանք տանը ինչքան հնարավոր է շատ։
Շաբաթ-կիրակի օրերին նույնպես պետք է մնալ տանը, չգնալ հյուր, ցերեկույթների, երեկույթների, մեր հարազատների հետ բնության գրկում պիկնիկների։
Պետք է դադարեցնել խմբակային կամ նույնիսկ անհատական այցերը տարատեսակ տեսարժան վայրեր, հիմա դրա ժամանակը չէ։
Պետք է դադարեցնել նշել տարբեր ուրախ առիթներ՝ երեխայի ծնունդ, ծննդյան արարողություններ, ամուսնության տարեդարձեր և այլն, այդ թվում ձեր իսկ տներում։
Սգո միջոցառումներին մասնակցությունը պետք է առավելագույնս սահմանափակել, պրակտիկորեն դադարեցնել։ Հեռախոսով ասված ցավակցությունը այս համաճարակային վիճակում ավելի արժեքավոր պետք է դիտվի, քան անձամբը։
Երեկոյան նույնպես պետք է մնալ տանը, չիջնել բակ, չշփվել հարևանների հետ։ Պարզապես պետք է չշփվել, չհանդիպել, իրարից հեռու մնալ, միասին սուրճ չխմել և այլն...»
Թորոսյանը կոչ է անում նաև քաղաքացիներին. «...Դադարեցրեք սրճարան-ռեստորանային այցելությունները, դա միակ տեղն է, որտեղ հնարավոր է լինել առանց դիմակի և վարակել միմյանց։ Եթե սնունդ եք ուզում ընդունել հենց այդ ռեստորանից, պատվիրեք այն և միայնակ սնվեք...»։
Նրա այս կոչից անմիջապես հետո ֆեյսբուքում հայտնվեցին մի քանի լուսանկարներ, թե ինչպես են իմքայլականները նստած սրճարանում: Այս ամենից հետո կամ Թորոսյանը պիտի ներողություն խնդրեր հանրությունից, որ իր կոչը արհամարվում է նույնիսկ իր թիմակիցներն, կամ էլ խմբագրեր իր խոսքեր` նշելով, որ օրինակ սրճարաններ այցելելը չի վնասում վարակի դեմ պայքարին:
Սակայն Թորոսյանից մենք այդպես էլ ոչ մի բացատրություն չլսեցինք, փոխարենը պարզաբանությամբ հանդես եկավ Ալեն Սիմոնյանը` վրդոհվելով, որ իբր «իրեն ու իր գործնկերոջը հետևում են, որպեսզի բռնացնեն, թե ինչպես են զրուցում սրճարանում...»:
Այսպիսի ցինիզմ դժվար էր նույնիսկ երազում պատկերացնել: Սրանք նույնիսկ չեն էլ գիտակցում, թե ինչ են անում: Եվ այս ամենից հետո Նիկոլ Փաշինյանն կարող է մեղադրել մեր ժողովուրդի բարքե՞րը: Մնացել էր դա լսեինք և ամեն ինչ տեղը կնկներ:
ԽՍՀՄ-ի պարտնոմենկլատուրայի փարիսեության բացահայտման համար անհրաժեշտ եղավ 70 տարի: Սրանց փնթի կառավարման փարիսեության բացահայտման համար նույնիսկ երկու տարին էր հերիք:
Սրանք նույնիսկ սեփական էգոիզմը չկարողացան թաքցնել այն չափ, որ մարդկանց գոնե «պողոսական» հատվածը շարունակեր իրենց հավատալ: Բայց այս ամենի մեջ երկիրն էր ափսոս, որն ընդամենը երկու տարվա այս գործընթացների ընթացքում կանգնել է համակարգային փլուզման առջև:
Սա է իրականությունը:
Դավիթ Մկրտչյան
Հետևեք մեզ Facebook-ում