Հպարտանում եմ, որ ունենք նման լավ ցուցանիշ․ Թորոսյանը՝ վարակից մահացության թվերի վերաբերյալ

NEWS.am-ը տեղեկացնում է. Թեեւ Հայաստանում վարակակիրների թիվը 1 միլիոն բնակչի հաշվով աշխարհում ամենաբարձրերից է, բայց 1 միլիոն բնակչի հաշվով ունենք մահացության ցածր ցուցանիշ։ Այս մասին հունիսի 26-ին Հանրային հեռուստաընկերության եթերում ասել է առողջապահության նախարար Արսեն Թորոսյանը՝ անդրադառնալով կորոնավիրուսի դեմ պայքարը ձախողելու վերաբերյալ՝ իրեն ուղղված քննադատություններին։   

«Բոլոր արձանագրված դեպքերից մահացության թվով մենք 1,7-1,8 տոկոսին ենք ձգտում։ Աշխարհում այդ ցուցանիշը 6 -10 տոկոս է։ 1 միլիոն բնակչի հաշվով մահերի թվով մենք հավասար ենք Գերմանիային։ Դա նշանակում է, որ անկախ նրանից, որ նոր դեպքեր են արձանագրվում եւ վարակը տարածվում է, մենք հասցնում ենք գրեթե բոլորին  պատշաճ բուժօգնություն մատուցել։ Մենք կարողացել ենք այնքան զարգացնել մեր առողջապահական ներուժը, որ ունենք նման լավ  ցուցանիշներ։ Ես հպարտանում եմ, որ ունենք նման լավ ցուցանիշներ։ Սա մեր ամբողջ առողջապահական համակարգի և մնացած աջակցող գերատեսչությունների շնորհիվ է, որ ունենք մահացության նման ցածր ցուցանի»,- ասել է նախարարը՝ նշելով, որ նախարարությունը պատշաճ է արձագանքել տվյալ պահին առաջացած իրավիճակին։

Նախարարը  հորդորել է չհամեմատել երկրները ըստ վարակվածների թվի, քանի որ տարբեր երկրներ ունեն թեստավորում անելու տարբեր ռազմավարություն:

«Այս հիվանդության դեմն առնել ոչ մի երկիր չի կարողանալու, եթե նույնիսկ հիմա կարողացել է ժամանակավոր: Միևնույնն է՝ սահմանները, տնտեսությունը, միջազգային շարժը  բացելուն զուգընթաց նորից դեպքերն արձանագրվելու են»,- ասել է նա։

Թորոսյանը նշել է նաեւ, որ հնարավոր է՝ մենք վարակի պիկ չունենանք։ 

«Մենք մեկ-երկու շաբաթ է նույն իրավիճակում ենք, միջազգային որոշ գործընկերներն էլ ասեցին՝ եթե դուք նույն վիճակով կայուն երկար գնաք, մինչեւ աշուն, միգուցե ավելի շահեկան դիրքում լինեք, քան մի անգամ ինտենսիվ պիկ ապրած երկրները, որոնք սպասում են երկրորդ ինտենսիվ պիկին»,- ասել է նա։

Ըստ Թորոսյանի՝ պետք է պատրաստ լինել առաջիկա մեկ տարում պետք է կենտրոնանալ տեղում խնդիրները լուծելու վրա եւ բացառել զբոսաշրջությունը։

Անդրադառնալով նախարարության՝ փոփոխվող դիմակային քաղաքականությանը, Թորոսյանը դրա մի քանի պատճառներ է նշել։

«Առաջինը՝ դիմակները այն ժամանակ  դիմակները սուղ էին և  պետք էին բուժաշխատողներին, պետք չէր առաջացնել արհեստական դեֆիցիտ շուկայում` սովորական մարդկան կրել տալով դիմակ,  իսկ բուժաշխատողներին թողնել անպաշտպան:  Երկրորդ՝ նոր հիվանդության հետ կուտակվում է նոր գիտելիք, նոր ապացուցվողական բազա, որը ցույց է տալիս, թե ինչպես է  այն տարածվում:

Մի քանի ամիս առաջ մոտեցումն այլ էր, ասվում էր, թե  ավելի շատ շփման մակերեսներով է վիրուսը տարածվում, հիմա աստիճանաբար ապացուցվողական բազան  տանում է հակառակին`ավելի շատ օդակաթիլային եղանակով է վիրուսը հասնում, դրա համար էլ հիմա դիմակների դերը էականորեն բարձրացել է»,- ասել է նա՝ ընդգծելով, որ իրենք միշտ ժամանակին համահունչ որոշումներ են կայացրել՝  սկսած սահմանները փակելուց հետո նաեւ սահմանափակումները բացելը։