Հայաստանի քաղաքական գրծընթացներում առկա «Կրեմլի հետքի» կամ «ռուսական նախագծի» մասին մանտրան կրկնող պոպուլիստները կամ չգիտեն կամ էլ պարզապես անտեսում են մի պարզ ու մակերեսին գտնվող հանգամանք

Ռուսական իշխանական էլիտան բազմաշերտ է ու բազմաբնույթ և բաղկացած է իրարամերժ քաղաքական դիրքորոշումներ ունեցող խմբերից՝ պահպանողականներ, այդ թվում՝ ռադիկալ պահպանողականներ, նեոլիբերալներ, ուժայիններ (իրենց ենթախմբերով), տեխնոկրատներ, օլիգարխներ և այլն: Որպես կանոն, այդ խմբերը կոշտ մրցակցային պայքարի մեջ են գտնվում միմյանց հետ՝ ձգտելով ավելացնել սեփական կշիռը պետական կառավարման համակարգում: Ուսումնասիրեք ռուսական իշխանական էլիտայի ձևավորման գենեոլոգիան, ուսումնասիրեք Ռուսաստանում առանձին ոլորտների (ֆինանսներ,կրթություն, ենթակառուցվածքներ, բանակ, ոստիկանություն) կառավարման համակարգերն ու կհամոզվեք դրանում ինքներդ: Միաժամանակ, նշված էլիտաների միջև մրցակցությունն ինքնաբուխ չէ, այն գնտվում է վերահսկողության տիրույթում, ինչը թույլ է տալիս ապահովել ՌԴ պետական կառավարման համակարգի ռազմավարական բազմազանությունը:

 

Ու երբ որևէ հայ քաղաքական գործիչ հանդիպում է այդ խմբերի ներկայացուցիչներից մեկի հետ, լուսանկարվում ու լսում աջակցության պատրաստակամության մասին խոսքեր, դա դեռ չի նշանակում, որ Մոսկվան Հայաստանում քաղաքական նախագիծ է իրականացնում: Ինչպես ասում են, Կրեմլը տարբեր աշտարակներ ունի, սակայն գլխավոր աշտարակը (Спасская башня) մեկն է: Ու դա չհասկացողները զբաղված են տեղեկատվական աղմուկ գեներացնելով:

 

Իսկ գլխավոր աշտարակը, վստահեցնում եմ, Հայաստանում որևէ քաղաքական նախագիծ չունի: Գոնե այս պահին: Սա ոչ ենթադրություն է, ոչ էլ քաղաքագիտական գնահատական: Սա պնդում է, որն անելու համար առկա են բոլոր օբյեկտիվ հիմքերը: