Մենք այսօր ունենք իշխանության յուրացում, որն իրականացնում է ՔՊ-ն՝ որպես կազմակերպություն և Նիկոլ Փաշինյանը՝ որպես անհատ․ Արա Սահակյան. Տեսանյութ

Երբ «Հայրենիք» կուսակցությունը հայտարարությամբ հանդես եկավ, մենք հույս ունեինք, որ «Լուսավոր Հայաստանը» կմիանա «ԲՀԿ»-ին, քանի որ լավատես էինք: Սակայն պարզվեց, որ և՛ հանրապետության նախագահը, և՛ Էդմոն Մարուքյանը գտնվում են տեղեկանքային սինդրոմի մեջ:

Այս մասին Անժելա Թովմասյանի՝ Արմնյուզ ՀԸ «Հայելու առաջ» հեղինակային հաղորդման ժամանակ ասել է «Հայրենիք» կուսակցության խորհրդի անդամ Արա Սահակյանն՝ անդրադառնալով ԱԺ արտահերթ նիստում ընդունված սահմանադրական փոփոխությունների օրենքին և «ԲՀԿ»-ի կողմից ստորագրահավաք նախաձեռնելուն ու ՍԴ դիմելու հարցին:

Արա Սահակյանը մի քանի դիտարկումներ է անում Էդմոն Մարուքյանի քաղաքական անցյալի վերաբերյալ և նշում. «Էդմոն Մարուքյանն ու այս իշխանությունը միևնույն արգանդից դուրս եկած պտուղներ են: Էդմոն Մարուքյանը չի կարող հանրային շահի տեսանկյունից հանդես գալ, քանի որ կաշկանդված է իր անցյալից և փրկում է իր կաշին»:

Դիտարկմանը, որ այս դեպքում կարող են շատ քաղաքական գործիչներ կաշկանդված լինել ու Նիկոլ Փաշինյանը կգործի այնպես, ինչպես ուզում է, Արա Սահակյանը նշել է. « Մեր կուսակցությունում ունենք ընդգծված քաղաքական անցյալով երկու անձնավորություն՝ ես և կուսակցության ղեկավար Արթուր Վանեցյանը: Արթուր Վանեցյանի գործողությունների մասին հանրությունը երբեք չէր իմանա, եթե ինքը չխոսեր դրա մասին»:

Ըստ Արա Սահակյանի՝ Արթուր Վանեցյանը ընտրել է այս ճանապարհը՝ հրապարակելով գործող իշխանության հետ գոյություն ունեցող խնդիրը. «Առաջին անգամ Ազգային անվտանգության ծառայության ղեկավարը հրապարակում է երկրի ղեկավարի հետ իր անհամաձայնությունը: Նա զգուշացրել էր, խնդրում էր կանգ առնել, սպասում էր՝ կարծելով, որ վարչապետը կարող է սթափվել, բայց կես տարի անց Արթուր Վանեցյանը հասկացավ, որ պետք է մարդկանց օգնել ազատվել այս իշխանությունից»:

Արա Սահակյանի դիտարկմամբ՝ իշխանությունը չի հասկանում ստեղծված իրավիճակի հետևանքները. «Հայաստանում գոյություն ունի սահմանադրական ճգնաժամ: Մենք այսօր ունենք իշխանության յուրացում, որն իրականացնում է «ՔՊ»-ն՝ որպես կազմակերպություն և Նիկոլ Փաշինյանը՝ որպես անհատ»:

Հարցին՝ ի վերջո ի՞նչ է տեղի ունեցել, Արա Սահակյանը պատասխանել է. «Տեղի ՝է ունեցել Սահմանադրության կամայական փոփոխություն, որով տապալվել է Սահմանադրական կարգը»:

Արա Սահակյանի խոսքով՝ կատարյալ կեղծիք է այն պնդումը, թե Հրայր Թովմասյանն այս Սահմանադրությունը հարմարեցրել է իրեն. «Սահմանադրական դատարանի նկատմամբ իրականացվող քայլերում իրավական ոչ մի գործընթաց չկա, ամբողջը քաղաքական է»: