Վերջապես հայտնի դարձավ, թե ինչ պաշտոն է ուզում Արամ Զավենիչը Նիկոլ Փաշինյանից

Երկու օր առաջ Պատրոս Ղազարյանի հաղորդման հյուրն էր Արամ Զավենիչը: Բնականաբար գլխավոր թեման նրա քծնանքն  էր առ Փաշինյան: Ընդ որում, Զավենիչը օգտագործում էր քծնանքի ամենաարևելյան ձևերը, հավանաբար հաշվի էր առել  հայտնի մեկնաբան Վլադիմիր Պոզների այն դիտարկումը, թե «...Փաշինյանն այն գործիչներից է, ում դուր է գալիս, որ իրեն քծնում են...»: Այն, որ Պոզները իրավացի է, պարզ երևում է  այն օրինակով, որ մինչ օրս նրա արձանը դեռ  կանգնած է Իջևանի մոտակայքում:

Բայց վերադառնանք մեր հերոսին, վերջինս, բնականաբար, անընդհատ շարունակում էր գովաբանել Փաշինյանին և փնովել ընդդիմությանը, բայց այս հաղորդման վերջում, իսկ հայտնի է, որ մարդն իր ուզածը սովորաբար վերջում է հայտնում, առաջին անգամ հրապարակեց, թե ինչ պաշտոն է ուզում Փաշինյանից այս երկու տարվա պնակալեզության համար:

Անդրադառնալով ԲՀԿ-ի քննադատությանը նա պահը բաց չթողնելով հրապարակավ հարցադրում կատարեց. «...ինչո՞ւ մինչև հիմա ԲՀԿ-ի ներկայացուցիչ փոխ-վարչապետը/նկատի ունի Մհեր Գրիգորյանին/  շարունակում է զբաղեցնել այդ պաշտոնը...»: Ի՞նչ արժանիքների համար, նյարդայնանում էր Զավենիչը: «...Նա պատասխանատու է երկիր մտնող գազի գնի համար, սակայն ողջ աշխարհում գազը էժանանում է, իսկ Հայաստանի համար այդ գինը թանկանում է...»,- ջղային դեմքով ավարտեց իր վրդովմունքը  Զավենիչը:

Մինչ այդ, հավանաբար ակնարկելով Վանեցյանին, Զավենիչը նշում էր, թե իբր «...ռուսական 5-րդ  շարասյունը սպառնում է երկրի անվտանգությանը...»: Բայց երբ հիշեց, որ նա  Մհեր Գրիգորյանի փոխ-վարչապետի պաշտոնն է  ուզում, իսկ դրա համար ռուսներին վիրավորել չի կարելի, իր գեղցի շուստրիության ձևով խմբագրեց իր նախկին միտքը, թե «...Հայաստանում  5-րդ շարասյան գործունեության համար ռուսները ոչ մի մեղք չունեն...»: Ըստ այս շուստրի գեղցիի, նրանք տեղյակ էլ չեն, որ Հայաստանում այս չափի  գործիչներ կան, որ ուզում են «հարամել» Փաշինյանի իշխանությունը, այսինքն,  նաև «հարամել» Զավենիչի վերջին հույսը:

Հավանաբար  այսպիսի պնակալեզների վրա կարող է իր հույսը դնել Փաշինյանը, բայց Զավենիչը 2018-ի հեղափոխությանը  գոնե սկզբնական փուլում դեմ է եղել, և ուրեմն նա կարող է և չբավարարել  իր տիրոջ չափանիչներին: Իսկ վերջինս այսօր ԱԺ-ի ամբիոնից հայտարարեց, որ  այսուհետ, ով սուտ խոսի, պիտի դառնա քաղաքական «դիակ»: Եվ ինքը թույլ չի տալու, որ ապագայում ԱԺ մտնեն այն ուժերը, որոնք դեմ են եղել 2018-ի հեղափոխությանը:  Այդ տեսանկյունից Զավենիչը կարող է իր պաշտոնը չստանալ: Պատկերացնո՞ւմ եք, այդ խոսքերից հետո նրան նշանակեն պաշտոնին՝ Փաշինյանն ինչ մեղադրանքների տարափ կարող է ստանալ: Հո նա, իր բնորոշմամբ,  քաղաքական «դիակ» չի ուզում դառնալ, այն էլ վաղաժամ, որ Զավենիչին, այսինքն 2018-ի հեղափոխության չողջունողին, նշանակի որևէ պաշտոնի:

Սա է իրականությունը:

Դավիթ Մկրտչյան