Բոլորը գիտեն Ձեր քաղաքական թիմի մակարդակը, նայեք ինքներդ Ձեզ, ոնց եք ձախողել բոլոր ոլորտներում ամեն ինչ. Միքայել Մելքումյանը՝ վարչապետին

ԱԺ «Բարգավաճ Հայաստան» խմբակցության պատգամավոր Միքայել Մելքումյանը ֆեյսբուքյան գրառում է արել, որում անդրադարձել է ԲՀԿ-ի մասին վարչապետ Նիկոլ Փաշինյանի կողմից այսօր ԱԺ-ից հնչեցված հայտարարություններին: Գրառման մեջ ասվում է.

«Սիրելի՛ հայրենակիցներ,
Սիրելի՛ ժողովուրդ,

Այսօր Հայաստանի Հանրապետության Ազգային ժողովում երկրի ղեկավարը ոչ քաղաքական բառապաշարով վիրավորանքներ հասցրեց մեր կուսակցությանը՝ ԲՀԿ-ին, շարունակելով այն գործընթացը, որ որևէ քաղաքական ուժ կամ քաղաքական գործիչ, եթե մատնանշում է երկրում ստեղծված աղետալի իրավիճակը, դրա պատճառները և պատասխանատուներին, ուրեմն այդ ուժը ինքնաոչնչանում է:

Ընդ որում, ի թիվս այլ մեղադրանքների, նա մատնանշեց նաև այն, որ իբր մեր քաղաքական ուժի ներկայացուցիչների կրթական ցենզը զիջում է քաղաքական մեծամասնությանը:

Հիմա հարց եմ տալիս Ձեզ, ժողովուրդ, ու՞մ կրթական ցենզն է զիջում, ի՞մ, մեր թիմի՞:

Հետևությունները թողնում եմ Ձեզ:

Բոլորը գիտեն Ձեր քաղաքական թիմի մակարդակը:

Եթե մեր հայրենիքում ոչնչացնում են քաղաքական կյանքը, սերմանում բիրտ թշնամանքի և ճնշումների միջավայր, այդ երկիրը դառնում է ոստիկանապետություն:

Նայեք ինքներդ Ձեզ: Ոնց եք ձախողել բոլոր ոլորտներում ամեն ինչ: Ի՞նչ է, ծափ տանք Ձեզ, որ ձախողել եք և շարունակում եք տապալել:

Հիմա այս մահերը, մեր համաքաղաքացիների մահերը, ու՞մ խղճին են, ընդդիմությա՞ն, թե՞ իշխանության:

Մի՛ կորցրեք Ձեր զգոնությունը:

Դուք դարձել եք սառնասիրտ և անտարբեր ձևով մեր համաքաղաքացիների սոսկ մահերն արձանագրողներ՝ մոռանալով, որ նրանցից յուրաքանչյուրի ետևում մարդկային ճակատագրեր են»: