«Տեղի է ունենում ընդդինադիր դաշտի ոչնչացում». Տիգրան Ուրիխանյանը՝ Էդմոն Մարուքյանի հայտարարության մասին. Տեսանյութ

Արդեն երրորդ օրն է ամբողջ տեղեկատվական դաշտը քննարկում է՝ Հայաստանում կա՞ ընդդիմութուն, թե՞ չկա, Aysor.am-ի հետ զրույցում ասել է ԱԺ պատգամավոր Տիգրան Ուրիխանյանը։

«Ինձ՝ որպես ինֆորմացիայի սպառող և որպես քաղաքացի, շատ է հուզում այդ հարցը», - ասել է Ուրիխանյանը։

Պատգամավորն ընդգծել է, որ խորհրդարանական մի ընդդիմությունը՝ ԲՀԿ-ն, համարում է իրեն ճնշված և խորհրդարանում ներկա չէ, մյուսը՝ փնտրում է երրորդ ճանապարհ․

«Հետևաբար ստացվում է՝ ընդդիություն Հայաստանում չկա։ Այս պահի դրությամբ ի դեմս երրորդ խորհրդարանական խմբակցության՝ կա ընդդիմությո՞ւն, թե՞ կա ընդդիմադիրոտ քաղաքական ուժ։ Այսինքն՝ ո՞վ է սպասարկում իշխանության հետ անհամաձայն քաղաքացիների քաղաքական շահը», - ասել է Ուրիխանյանը։

Նրա խոսքով, եթե հասարակության ընդդիմադիր հատվածի հույսերը կոտրվում են, նրանց քաղաքական շահերը չեն սպասարկվում, տվյալ ուժը ոչ միայն համեմատաբար փոքրաթիվ քվեից է զրկվում, այլև հետագայում քաղաքական մեծամասնությանը հավակնելու համար անհրաժեշտ չափով քվեից։

«Տեղի է ունենում ընդդիմադիր դաշտի ոչնչացում, առնվազն խոհրդարանական հարթակում։ Ես այդպես եմ գնահատում «Լուսավոր Հայաստանի» արածը», - ասաց պատգամավորը։

Հարցին՝ ի՞նչն է խանգարում խորհրդարանական երկու ընդդիմադիր ուժերին համախմբվել, այն դեպքում, երբ երկուսն էլ դժգոհ են իշխող մեծամասնության որոշումներից, և ինչո՞ւ արդեն, ըստ էության, երկրորդ անգամ ԼՀԿ-ն չի ստորագրում ԲՀԿ նախաձեռնությունը ՍԴ դիմելու համար՝ Տիգրան Ուրիխանյանն ասաց․

«Եթե շատ անկեղծ լինենք և մի կողմ դնենք դիվանագիտական ձևակերպումները, ապա՝ հաշվարկները, հնարավորինս մեղմ տիրույթում տեղավորվելու ցանկությունն ու ռիսկերից ապահովագրվելը»։

Մանրամասները՝ Aysor.am-ի տեսանյութում։