«Ի՞նչ ես առավոտ շուտ քեզանից բաներ խոսում». Սուրիկ Խաչատրյանն իր՝ ՀՀԿ-ից դուրս գալու մասին

Սյունիքի նախկին մարզպետ Սուրիկ Խաչատրյանը տեղեկությանը, թե ինքը ևս պատրաստվում է լքել Հայաստանի Հանրապետական կուսակցությունը, արձագանքեց՝ «ինչ ես առավոտ շուտ քեզնից բաներ խոսում» ու ցած դրեց հեռախոսափողը: Հաղորդում է «Tert.am»-ը: 

Ինչից հետո արդեն Սյունիքի նախկին մարզպետի հետ այլևս հնարավոր չէր կապ հաստատել:

Հիշեցնենք, որ նրա, ինչպես նաև ԱԺ «Հանրապետական» խմբակցության պատգամավոր Մհեր Սեդրակյանի անունը երեկ կեսօրից՝ ՀՀ նախկին վարչապետ Հովիկ Աբրահամյանի՝ ՀՀԿ-ից դուրս գալու հայտարարությունից հետո շրջանառվում է այն համատեքստում, որ նրանք ևս լքելու են ՀՀԿ-ն:

Նշենք, որ Մհեր Սեդրակյանը ևս երեկվանից խուսափողական վարքագիծ է դրսևորում, սկզբում հասանելի էր, սակայն նրա հեռախոսին պատասխանած վարորդը, չնայած որ կողքից լսվում էր պարոն Սեդրակյանի ձայնը, ասաց, որ վերջինս տեղում չէ, զբաղված է։ Ավելի ուշ նա ավելացրեց, որ Սեդրակյանն այլ մեքենայով տեղ է գնացել, իսկ մի ժամից հետո էլ նրա հեռախոսահամարն անհասանելի դարձավ:

Աղբյուր՝ «Tert.am»